દેશના અનેક રાજ્યોમાં ભારે વરસાદે મુશ્કેલી વધારી છે. જમ્મુ-કાશ્મીરથી લઈને ઓડિશા અને સિક્કિમ સુધી નદી-નાળાઓમાં જળસ્તર ઝડપથી વધી રહ્યું છે, જેના કારણે નીચાણવાળા વિસ્તારોમાં પૂર અને પહાડી વિસ્તારોમાં ભૂસ્ખલનનો ખતરો વધ્યો છે.
જમ્મુ-કાશ્મીરના ડોડા જિલ્લાના ભલેસા-ગંડોહ વિસ્તારમાં ધોધમાર વરસાદને કારણે બજારો, રસ્તાઓ અને નદી-નાળાઓમાં પાણી ભરાયા છે. સતત વરસાદના પગલે સ્થાનિક વિસ્તારોમાં પૂરનું જોખમ ગંભીર બન્યું છે.
ઓડિશાના મયુરભંજ જિલ્લામાં પણ ભારે વરસાદથી નદીઓમાં પાણીની સપાટી સતત વધી રહી છે. કેન્દ્રપાડા જિલ્લામાં નેશનલ હાઈવે-53નો આશરે 100 મીટર હિસ્સો ધસી પડતાં ત્રણ ટ્રક ખાઈમાં ખાબક્યા હતા. સદનસીબે ટ્રકમાં કોઈ ડ્રાઈવર કે હેલ્પર ન હોવાથી મોટી જાનહાનિ ટળી હતી.
સિક્કિમના ગ્યાલશિંગ જિલ્લામાં ભૂસ્ખલન બાદ અસરગ્રસ્ત પરિવારોને સલામત સ્થળે ખસેડવાના નિર્દેશ આપવામાં આવ્યા છે. બીજી તરફ તમિલનાડુના અનેક જિલ્લાઓમાં આગામી દિવસોમાં ભારે વરસાદ અને વાવાઝોડાની શક્યતા વ્યક્ત કરવામાં આવી છે.
હવામાન વિભાગે દિલ્હી, ઉત્તર પ્રદેશ, બિહાર સહિત 19 રાજ્યોમાં ભારે વરસાદ અને વાવાઝોડાની આગાહી કરી છે. પહાડી રાજ્યોમાં 17 અને 18 ઓગસ્ટે ભારે વરસાદનું એલર્ટ આપવામાં આવ્યું છે, જ્યારે પશ્ચિમ હિમાચલ પ્રદેશમાં પણ ભારે વરસાદની સંભાવના છે. દિલ્હી-NCRમાં આગામી દિવસોમાં હળવાથી મધ્યમ વરસાદ પડી શકે છે.
