વધુ બળપ્રયોગ કરનાર અધિકારીઓ સામે કાર્યવાહી થશે; ધરણા માટે વૈકલ્પિક સ્થળ અંગે કેન્દ્રને નોટિસ
નવી દિલ્હી: કોકરોચ જનતા પાર્ટીના વિદ્યાર્થી આંદોલન દરમિયાન પોલીસ અને અર્ધલશ્કરી દળો દ્વારા થયેલા કથિત બળપ્રયોગ મામલે સુપ્રીમ કોર્ટે કડક વલણ અપનાવ્યું છે. મુખ્ય ન્યાયાધીશ સૂર્યકાંતની અધ્યક્ષતાવાળી ખંડપીઠે જણાવ્યું કે વધુ પડતો બળપ્રયોગ કરનાર અધિકારીઓને છોડવામાં નહીં આવે અને સમગ્ર ઘટનાની ન્યાયિક તપાસ અંગે વિચારણા ચાલી રહી છે.
સુપ્રીમ કોર્ટે નિવૃત્ત ન્યાયાધીશની અધ્યક્ષતામાં તપાસ પંચ રચવાના સંકેત આપ્યા છે. આ અંગેનો અંતિમ નિર્ણય 18 ઓગસ્ટે લેવામાં આવશે. સાથે જ અદાલતે સ્પષ્ટ કર્યું કે વિદ્યાર્થીઓ સામે નોંધાયેલા કેસ સરકાર કાયદાકીય પ્રક્રિયા મુજબ પરત ખેંચી શકે છે. જોકે ગંભીર ગુનાહિત ઇતિહાસ ધરાવતા લોકો માટે આ રાહત લાગુ નહીં પડે.
અલગ સુનાવણીમાં સુપ્રીમ કોર્ટે જંતર-મંતરને ધરણા-પ્રદર્શન માટે યોગ્ય સ્થળ તરીકે યથાવત રાખવું કે નહીં તે મુદ્દે પણ વિચારણા શરૂ કરી છે. અરજીમાં દલીલ કરવામાં આવી હતી કે આવા પ્રદર્શનોથી ટ્રાફિક અને આવશ્યક સેવાઓ પ્રભાવિત થાય છે. આ મુદ્દે કોર્ટે કેન્દ્ર સરકારને નોટિસ પાઠવી અભિપ્રાય માંગ્યો છે.
અદાલતે એ પણ સ્પષ્ટ કર્યું કે ભવિષ્યમાં કોઈપણ રેલી કે કૂચ દરમિયાન ટ્રાફિક અને એમ્બ્યુલન્સ જેવી આવશ્યક સેવાઓમાં વિક્ષેપ ન પડે તેની જવાબદારી સંબંધિત તંત્રની રહેશે.
