લેબર પાર્ટીના નવા નેતા તરીકે બિનહરીફ પસંદગી; કીટ સ્ટારમરના રાજીનામા બાદ સોમવારે લેશે વડાપ્રધાન તરીકે શપથ
લંડન: બ્રિટનની સત્તારૂઢ લેબર પાર્ટીએ પૂર્વ ગ્રેટર મૅન્ચેસ્ટરના મેયર અને મેકરફિલ્ડના સાંસદ એન્ડી બર્નહમને પક્ષના નવા નેતા તરીકે સત્તાવાર રીતે પસંદ કર્યા છે. બર્નહમની બિનહરીફ પસંદગી સાથે તેમના બ્રિટનના આગામી વડાપ્રધાન બનવાનો માર્ગ પણ નિશ્ચિત થયો છે. તેઓ આગામી સપ્તાહે વડાપ્રધાન તરીકે શપથ ગ્રહણ કરશે.
લેબર પાર્ટીના વિશેષ અધિવેશન દરમિયાન પાર્ટીની રાષ્ટ્રીય કાર્યકારિણી સમિતિની અધ્યક્ષ શબાના મહમૂદે એન્ડી બર્નહમના નામની સત્તાવાર જાહેરાત કરી હતી. નેતૃત્વની રેસમાં બર્નહમ એકમાત્ર ઉમેદવાર રહ્યા હોવાથી તેમની નિમણૂક સર્વસંમતિથી થઈ હતી.
હાલના વડાપ્રધાન કીટ સ્ટારમર સોમવારે રાજા ચાર્લ્સ ત્રીજાને પોતાનું રાજીનામું સોંપશે. ત્યારબાદ રાજા બર્નહમને નવી સરકાર રચવા આમંત્રણ આપશે અને તેઓ બ્રિટનના નવા વડાપ્રધાન તરીકે કાર્યભાર સંભાળશે. બ્રિટનની સંસદીય પરંપરા મુજબ સત્તારૂઢ પક્ષના નવા નેતાને સામાન્ય ચૂંટણી વિના પણ વડાપ્રધાન તરીકે નિયુક્ત કરી શકાય છે.
નેતા તરીકે ચૂંટાયા બાદ એન્ડી બર્નહમે જણાવ્યું હતું કે તેઓ દેશને નવી દિશા આપવા, લોકોનો વિશ્વાસ પુનઃસ્થાપિત કરવા અને કીટ સ્ટારમરે ઉભા કરેલા પાયા પર આગળ વધવા પ્રતિબદ્ધ છે. તેમણે સમગ્ર લેબર પાર્ટીને સાથે લઈને કામ કરવાની અને જનહિતને પ્રાથમિકતા આપતી સરકાર આપવાનો સંકલ્પ વ્યક્ત કર્યો હતો.
56 વર્ષીય એન્ડી બર્નહમ વર્ષ 2001થી બ્રિટિશ રાજકારણમાં સક્રિય છે. તેઓ પૂર્વ વડાપ્રધાન ટોની બ્લેર અને ગોર્ડન બ્રાઉનની સરકારોમાં વિવિધ મહત્વપૂર્ણ મંત્રાલયોની જવાબદારી સંભાળી ચૂક્યા છે. ગ્રેટર મૅન્ચેસ્ટરના મેયર તરીકે પણ તેમણે નોંધપાત્ર કામગીરી કરી હતી, જેના કારણે તેઓ બ્રિટિશ રાજકારણમાં પ્રભાવશાળી નેતા તરીકે ઓળખાય છે.
