દેશની બેન્કિંગ વ્યવસ્થા સંપૂર્ણપણે ડિજિટલ તરફ આગળ વધી ગઈ છે, ત્યારે 1891ના બેન્કિંગ બુક્સ એવિડન્સ એક્ટમાં મહત્વના સુધારા કરવામાં આવ્યા છે. હવે બેન્કિંગ વિવાદોમાં માત્ર કાગળ, લેજર અને ફિઝિકલ દસ્તાવેજો જ નહીં, પરંતુ ડિજિટલ ડેટા અને ઇલેક્ટ્રોનિક રેકોર્ડ પણ કાનૂની પુરાવા તરીકે માન્ય રહેશે.
નવી જોગવાઈ હેઠળ બેન્કોએ ડિજિટલ રેકોર્ડની સર્ટિફાઇડ કોપી રજૂ કરવાની રહેશે. આ ફેરફારથી 135 વર્ષ જૂના કાયદાને આધુનિક ડિજિટલ બેન્કિંગ વ્યવસ્થા સાથે સુસંગત બનાવવામાં આવ્યો છે.
સુધારામાં પોલીસ અને અન્ય કાયદા અમલીકરણ એજન્સીઓને તપાસ દરમિયાન બેન્ક ગ્રાહકોના ખાતા અને અન્ય માહિતી સીધી બેન્ક પાસેથી મેળવવાની જોગવાઈ પણ કરવામાં આવી છે. અગાઉ આવી માહિતી માટે કોર્ટની મંજૂરી જરૂરી હતી.
સામાન્ય કેસમાં બેન્કે ગ્રાહકને માહિતી માગવામાં આવી હોવાની જાણ કરવાની રહેશે. જોકે નાણાકીય ગુના અથવા રાષ્ટ્રીય સુરક્ષાની તપાસ ચાલી રહી હોય ત્યારે ગ્રાહકને જાણ કરવી જરૂરી રહેશે નહીં.
