જીરાફ સર્કલ પાસે પોલીસની કાર્યવાહી; કારમાંથી રૂ.3.74 લાખનો વિદેશી દારૂ મળ્યો, વાહન સહિત રૂ.17.31 લાખનો મુદ્દામાલ જપ્ત
અમદાવાદ: અમદાવાદ શહેરમાં દારૂની હેરાફેરી સામે પોલીસ દ્વારા કાર્યવાહી કરવામાં આવી રહી છે, ત્યારે મણિનગર વિસ્તારમાં ઝોન-6 લોકલ ક્રાઇમ બ્રાન્ચ (LCB)એ મોડી રાત્રે ફિલ્મી ઢબે પીછો કરીને વિદેશી દારૂ ભરેલી કાર ઝડપી પાડી હતી. જીરાફ સર્કલ પાસે કરવામાં આવેલી આ કાર્યવાહીમાં પોલીસે કારમાંથી રૂ.3.74 લાખની કિંમતનો વિદેશી દારૂનો જથ્થો કબજે કર્યો હતો. કારચાલક સહિત ભાગવાનો પ્રયાસ કરી રહેલા બે શખ્સોને પણ પોલીસે ઝડપી લીધા હતા. દારૂ અને કાર સહિત કુલ રૂ.17.31 લાખનો મુદ્દામાલ જપ્ત કરવામાં આવ્યો છે.
બાતમીના આધારે જીરાફ સર્કલ પાસે ગોઠવી વોચ
પોલીસ પાસેથી મળતી માહિતી મુજબ, ઝોન-6 LCBની ટીમને બાતમી મળી હતી કે એક કારમાં મોટા પ્રમાણમાં વિદેશી દારૂનો જથ્થો ભરીને કેટલાક શખ્સો મણિનગર તરફ આવી રહ્યા છે. બાતમીને આધારે પોલીસે જીરાફ સર્કલ પાસે વોચ ગોઠવી હતી અને શંકાસ્પદ વાહનો પર નજર રાખવાનું શરૂ કર્યું હતું.
આ દરમિયાન બાતમી મુજબની કાર ત્યાંથી પસાર થતાં પોલીસે તેને રોકવાનો પ્રયાસ કર્યો હતો. જોકે, કારચાલકે પોલીસને જોઈને ગાડીની ઝડપ વધારી દીધી હતી અને પૂરઝડપે ભાગવા લાગ્યો હતો. આથી પોલીસ ટીમે તાત્કાલિક ખાનગી વાહનોમાં કારનો પીછો શરૂ કર્યો હતો.
ફિલ્મી ઢબે પીછો કરી કારને ઘેરી લીધી
પોલીસ અને કાર વચ્ચે થોડે અંતર સુધી પીછો ચાલ્યો હતો. અંતે LCBની ટીમે કારને ઘેરીને અટકાવી દીધી હતી. કાર ઊભી રહેતાં જ તેમાં સવાર શખ્સોએ નીચે ઉતરીને અંધારાનો લાભ લઈ ભાગવાનો પ્રયાસ કર્યો હતો. જોકે, પોલીસે તાત્કાલિક કોર્ડન કરીને બે શખ્સોને ઝડપી લીધા હતા.
ત્યારબાદ કારની તપાસ કરવામાં આવતાં તેમાંથી રૂ.3.74 લાખની કિંમતનો વિદેશી દારૂનો જથ્થો મળી આવ્યો હતો. પોલીસે દારૂનો જથ્થો કબજે કરી કાર પણ જપ્ત કરી હતી. આ કાર્યવાહીમાં દારૂ અને કાર સહિત કુલ રૂ.17.31 લાખનો મુદ્દામાલ કબજે કરવામાં આવ્યો હોવાનું જાણવા મળે છે.
શામળાજીથી વિવેકસિંહ પાસેથી લવાયો હતો દારૂનો જથ્થો
પ્રાથમિક તપાસ દરમિયાન દારૂનો આ જથ્થો શામળાજીથી વિવેકસિંહ ઉર્ફે બાપુ પાસેથી લાવવામાં આવી રહ્યો હોવાનું સામે આવ્યું છે. આ મામલે પોલીસે સાહિલ, ધ્રુવ ઉર્ફે ધુલીયો સહિત કુલ સાત શખ્સો સામે ગુનો નોંધ્યો છે.
પોલીસ હવે દારૂનો જથ્થો ક્યાં પહોંચાડવાનો હતો, તેની હેરાફેરીમાં અન્ય કોણ-કોણ સામેલ છે અને આ નેટવર્ક કેટલા સમયથી કાર્યરત છે તે સહિતની વિગતો મેળવવા તપાસ કરી રહી છે. મણિનગર વિસ્તારમાં મોડી રાત્રે થયેલી આ કાર્યવાહીથી દારૂની હેરાફેરી કરતા તત્વોમાં ફફડાટ ફેલાયો છે.
