મેઘપર પોલીસે વોચ ગોઠવી જામનગરના 21 વર્ષીય કારચાલકને પકડ્યો; થાનગઢથી દારૂ લાવી સિંગચ ગામે પહોંચાડવાનો હતો, બે શખ્સો ફરાર
જામનગરઃ જામનગર જિલ્લાના લાલપુર તાલુકામાં દારૂની હેરાફેરી સામે મેઘપર (પડાણા) પોલીસે કાર્યવાહી કરી છે. ઝાંખર ગામ પાસે પુલની કામગીરી ચાલી રહી હતી તે સ્થળે પોલીસે વોચ ગોઠવી સ્વિફ્ટ કારને અટકાવી હતી. કારની તલાશી લેતાં તેમાંથી અલગ-અલગ બ્રાન્ડની નાની-મોટી કુલ 216 બોટલ વિદેશી દારૂ મળી આવી હતી. પોલીસે દારૂનો જથ્થો અને કાર સહિત કુલ રૂ.5.05 લાખનો મુદ્દામાલ કબજે કરીને કારચાલકની ધરપકડ કરી છે.
મેઘપર પોલીસ સ્ટેશનના સર્વેલન્સ સ્ટાફને બાતમી મળી હતી કે ઝાંખર ગામના પાટિયા તરફથી એક સ્વિફ્ટ કારમાં વિદેશી દારૂનો જથ્થો ભરીને શખ્સ ઝાંખર ગામ તરફ આવી રહ્યો છે. બાતમીને આધારે પોલીસે તાત્કાલિક કાર્યવાહીનું આયોજન કર્યું હતું અને ઝાંખર ગામ નજીક પુલ બનાવવાની કામગીરી ચાલી રહી છે તે સ્થળે પોલીસ સ્ટાફે વોચ ગોઠવી હતી.
દરમિયાન બાતમીમાં જણાવેલી સ્વિફ્ટ કાર ત્યાંથી પસાર થતાં પોલીસે તેને કોર્ડન કરી અટકાવી હતી. ત્યારબાદ કારની તલાશી લેવામાં આવતાં અંદરથી અલગ-અલગ બ્રાન્ડની કુલ 216 બોટલ વિદેશી દારૂ મળી આવ્યો હતો. દારૂનો જથ્થો મળી આવતાં પોલીસે કારચાલકની અટકાયત કરી કાયદેસરની કાર્યવાહી હાથ ધરી હતી.
21 વર્ષીય કારચાલકની ધરપકડ
પોલીસે કારચાલક મહેન્દ્રસિંહ ગુમાનસિંહ વાઢેર (ઉંમર 21 વર્ષ, રહે. કૃષ્ણનગર શેરી નં.5, રોઝી પેટ્રોલ પંપ પાસે, જામનગર)ની ધરપકડ કરી હતી. પોલીસ દ્વારા દારૂની કિંમત રૂ.1 લાખથી વધુ આંકવામાં આવી છે. દારૂના જથ્થા ઉપરાંત હેરાફેરીમાં ઉપયોગમાં લેવાયેલી સ્વિફ્ટ કાર સહિત કુલ રૂ.5.05 લાખનો મુદ્દામાલ કબજે કરવામાં આવ્યો છે.
થાનગઢથી જથ્થો લાવી સિંગચ ગામે પહોંચાડવાનો હતો
પકડાયેલા કારચાલકની પૂછપરછ અને પ્રાથમિક તપાસ દરમિયાન દારૂનો જથ્થો સુરેન્દ્રનગર જિલ્લાના થાનગઢના રહેવાસી કેતનભાઈ વિરજીભાઈ પરમાર પાસેથી મેળવ્યો હોવાનું સામે આવ્યું હતું. આ દારૂનો જથ્થો લાલપુર તાલુકાના સિંગચ ગામના રહેવાસી ઇશ્વરસિંહ સદુભા વાઢેરને પહોંચાડવાનો હોવાનું પણ તપાસમાં ખુલ્યું છે.
આમ, દારૂનો જથ્થો થાનગઢથી મેળવી જામનગર જિલ્લાના સિંગચ ગામ સુધી પહોંચાડવાની હેરાફેરીમાં કારનો ઉપયોગ કરવામાં આવી રહ્યો હતો. પોલીસે આ કેસમાં કેતનભાઈ પરમાર અને ઇશ્વરસિંહ વાઢેરને ફરાર દર્શાવી તેમની શોધખોળ શરૂ કરી છે. દારૂનો જથ્થો ક્યાંથી લાવવામાં આવ્યો હતો અને આ હેરાફેરીમાં અન્ય કોઈ વ્યક્તિ સામેલ છે કે કેમ તે દિશામાં પણ તપાસ હાથ ધરવામાં આવી છે.
પ્રોહિબિશન એક્ટ હેઠળ ગુનો નોંધાયો
મેઘપર પોલીસે આ મામલે પ્રોહિબિશન એક્ટની કલમ 65(ઈ), 116(બી), 81 અને 98(2) હેઠળ ગુનો નોંધી કાયદેસરની કાર્યવાહી કરી છે. એક તરફ કારચાલકની ધરપકડ કરવામાં આવી છે, જ્યારે દારૂનો જથ્થો પૂરો પાડનાર અને તેને પહોંચાડવાનો હતો તે બંને શખ્સોની શોધખોળ ચાલુ છે. પોલીસ તપાસ પૂર્ણ થયા બાદ દારૂની હેરાફેરીના અન્ય પાસાઓ અંગે વધુ વિગતો સામે આવી શકે છે.
