ઉત્તર પ્રદેશની રાજધાની લખનૌના સઆદતગંજ વિસ્તારના નૌબસ્તામાં બાઉન્ડ્રી વોલના નિર્માણને લઈને થયેલા વિવાદે હિંસક સ્વરૂપ ધારણ કર્યું હતું. સોમવારે ધોળા દિવસે થયેલા ફાયરિંગમાં પિતા-પુત્ર સહિત ત્રણ લોકોનાં મોત નીપજ્યાં હતાં, જ્યારે એક વ્યક્તિ ઘાયલ થઈ હતી. પોલીસે આ કેસમાં આરોપી ઋષભ શુક્લાની ધરપકડ કરી હોવાનું જાણવા મળ્યું છે.
પોલીસના જણાવ્યા અનુસાર, નૌબસ્તામાં આવેલા વડના વૃક્ષ પાસે બાઉન્ડ્રી વોલનું નિર્માણ ચાલી રહ્યું હતું. આ વૃક્ષની નીચે દર વર્ષે વટ સાવિત્રીની પૂજા કરવામાં આવે છે. નગર નિગમ દ્વારા સ્થાનિક સભાસદના માધ્યમથી છેલ્લા એક મહિનાથી બાઉન્ડ્રી વોલ બનાવવાની કામગીરી ચાલી રહી હતી.
મૃતકોના પરિવારજનોના જણાવ્યા મુજબ, ઋષભ શુક્લા અને તેના પરિવારજનો બાઉન્ડ્રી વોલના નિર્માણનો વિરોધ કરી રહ્યા હતા. આ મુદ્દે અગાઉ પણ બંને પક્ષો વચ્ચે વિવાદ થયો હતો, પરંતુ સ્થાનિક સભાસદના હસ્તક્ષેપ બાદ મામલો શાંત પડ્યો હતો.
પ્રત્યક્ષદર્શીઓના જણાવ્યા અનુસાર, ફરિયાદી શંભુ તિવારી વડના વૃક્ષ નીચે બેઠા હતા ત્યારે ઋષભ શુક્લા ત્યાં આવી પહોંચ્યો હતો. ત્યારબાદ બંને પક્ષો વચ્ચે બોલાચાલી થઈ હતી, જે આગળ જતાં મારામારીમાં ફેરવાઈ હતી. આ દરમિયાન આરોપી ઘરે જઈ પિસ્તોલ લાવ્યો હતો અને ફાયરિંગ કર્યું હતું.
ફાયરિંગમાં પિતા-પુત્ર અને તેમના એક સંબંધીનું મોત થયું હતું, જ્યારે અન્ય એક વ્યક્તિ ઘાયલ થઈ હતી. ઘટનાની જાણ થતાં પોલીસ ઘટનાસ્થળે પહોંચી હતી અને આરોપીને ઝડપી લીધો હતો. બાઉન્ડ્રી વોલના વિવાદમાં થયેલી આ હિંસક ઘટનાથી વિસ્તારમાં ચકચાર મચી ગઈ છે.
