દુબઈમાં ભારતીય જ્વેલરી બ્રાન્ડ જોયઆલુક્કાસે પરંપરાગત ભારતીય ઘરેણાંની ભવ્યતાને વૈશ્વિક ઓળખ અપાવી છે. 22 કેરેટ સોનામાંથી તૈયાર કરાયેલી 16.514 કિલોગ્રામ વજનની વિશાળ ઝુમકાની જોડીએ બે ગિનિસ વર્લ્ડ રેકોર્ડ પોતાના નામે કર્યા છે. ‘મયૂર સહસ્ર’ નામની આ કલાકૃતિને વિશ્વનાં સૌથી ભારે અને સૌથી મોટા સોનાનાં ઝુમકા તરીકે માન્યતા મળી છે.
આ અનોખી કલાકૃતિનું અનાવરણ દુબઈ ગોલ્ડ ડિસ્ટ્રિક્ટ સ્થિત ‘જ્વેલ ઓફ જોય’ શોરૂમમાં કરવામાં આવ્યું હતું. આ પ્રસંગે યુએઈના અર્થતંત્ર અને પ્રવાસન મંત્રી અબ્દુલ્લા બિન તૌક અલ મરી પણ ઉપસ્થિત રહ્યા હતા. આ વિશાળ ઝુમકાં ભારતીય પરંપરાગત કારીગરી અને આધુનિક સર્જનાત્મકતાનું અનોખું ઉદાહરણ છે.
ઝુમકાની લંબાઈ 1.215 મીટર એટલે કે આશરે ચાર ફૂટ છે, જ્યારે તેનો વ્યાસ 0.682 મીટર છે. તેનું કુલ વજન 16.514 કિલોગ્રામ નોંધાયું છે. સામાન્ય રીતે લગ્નપ્રસંગો અને તહેવારોમાં પહેરવામાં આવતાં ઝુમકાંની સરખામણીએ આ કલાકૃતિ કદ અને વજનમાં અત્યંત વિશાળ છે.
આ ભવ્ય ઝુમકાં તૈયાર કરવા માટે 55 નિષ્ણાત કારીગરોએ મહેનત કરી હતી અને તેને પૂર્ણ કરવામાં કુલ 5,840 કલાકનો સમય લાગ્યો હતો. ભારતીય સંસ્કૃતિમાં સૌંદર્ય અને ભવ્યતાના પ્રતીક એવા મોર પરથી તેની ડિઝાઇન અને ‘મયૂર સહસ્ર’ નામની પ્રેરણા લેવામાં આવી છે. ઝુમકાના નીચેના ભાગમાં પરંપરાગત ઘંટાકાર આકાર જાળવી રાખવામાં આવ્યો છે.
જોયઆલુક્કાસ જ્વેલરીના સીઈઓ જોન પોલ અલુક્કાસના જણાવ્યા અનુસાર, આ વિચાર દુબઈ સાથેના તેમના લાંબા સમયના સંબંધો અને શહેરના વિકાસથી પ્રેરિત છે. દુબઈ વિશ્વભરમાં સોનાના વેપાર માટે જાણીતા શહેરોમાં સ્થાન ધરાવે છે. આ અનોખી સિદ્ધિ ભારતીય જ્વેલરી કળાની પ્રતિભા અને પરંપરાગત ઘરેણાંની વૈશ્વિક લોકપ્રિયતાને વધુ ઉજાગર કરે છે.
