બોલિવૂડ અભિનેતા ટાઈગર શ્રોફની કાર પર ફાયરિંગની ઘટના બાદ હવે અભિનેતા આમિર ખાનને ધમકી આપવામાં આવી હોવાના અહેવાલ સામે આવ્યા છે. સોશિયલ મીડિયા પર ટાઈસન બિશ્નોઈ અને આરઝૂ બિશ્નોઈના નામે ચાલતા એકાઉન્ટ્સ પરથી ધમકીભરી પોસ્ટ કરવામાં આવી હોવાનો દાવો છે. પોસ્ટમાં આમિર ખાનના અંગત જીવન અને તેમની પ્રવૃત્તિઓને લઈને વાંધો ઉઠાવવામાં આવ્યો છે.
આ દરમિયાન, ટાઈગર શ્રોફની કાર પર થયેલા ફાયરિંગની તપાસમાં બોલિવૂડના અન્ય જાણીતા કલાકારો પણ સંભવિત નિશાના પર હોવાની વિગતો સામે આવી હોવાના અહેવાલ છે. તપાસ સાથે સંકળાયેલા સૂત્રોને ટાંકીને કરવામાં આવેલા દાવા મુજબ, અમિતાભ બચ્ચન, આમિર ખાન, અક્ષય કુમાર અને સલમાન ખાનનાં ઘરોની રેકી કરવામાં આવી હોવાની આશંકા છે.
અહેવાલો અનુસાર, આરોપીઓએ ઓટો રિક્ષા ચાલકોની મદદથી કેટલાક કલાકારોનાં ઠેકાણાં વિશે માહિતી એકત્રિત કરી હતી. ત્યારબાદ 18 ઓક્ટોબરે જુહુ વિસ્તારમાં ટાઈગર શ્રોફની કાર પર ફાયરિંગની ઘટના બની હતી.
હાલમાં આ મામલે પોલીસ તપાસ કરી રહી છે. જોકે, સોશિયલ મીડિયા પર કરવામાં આવેલી ધમકી અને અન્ય કલાકારોને નિશાન બનાવવાના દાવાઓ અંગે સત્તાવાર પુષ્ટિ જરૂરી છે.
