બંગાળની ખાડીમાં સર્જાયેલું લો-પ્રેશર વધુ શક્તિશાળી બનતાં વાવાઝોડામાં પરિવર્તિત થયું છે. તેને ‘અર્નબ’ નામ આપવામાં આવ્યું છે. વાવાઝોડું 28 ઓક્ટોબરે આંધ્રપ્રદેશના દરિયાકાંઠે ત્રાટકવાની શક્યતા વચ્ચે ઓડિશા અને પશ્ચિમ બંગાળમાં પણ તેની વ્યાપક અસર થવાની આશંકા છે. પરિસ્થિતિને ધ્યાનમાં રાખીને કેટલીક શૈક્ષણિક સંસ્થાઓમાં રજા જાહેર કરવામાં આવી છે.
વાવાઝોડાની સંભવિત અસરને પગલે હવામાન વિભાગે વિવિધ રાજ્યોમાં ભારે વરસાદની ચેતવણી આપી છે. દરિયાકાંઠાના વિસ્તારોમાં પવનની ગતિ વધવાની શક્યતા હોવાથી માછીમારોને દરિયો ન ખેડવા સૂચના આપવામાં આવી છે. સંભવિત આપત્તિને પહોંચી વળવા સંબંધિત રાજ્યોમાં રાહત અને બચાવ ટીમોને પણ સજ્જ રાખવામાં આવી છે.
આંધ્રપ્રદેશ, ઓડિશા અને પશ્ચિમ બંગાળ સહિત પૂર્વ અને દક્ષિણ ભારતના અનેક વિસ્તારોમાં ભારે વરસાદની શક્યતા છે. વાવાઝોડાની અસરથી જનજીવન ખોરવાવાની આશંકા વચ્ચે વહીવટી તંત્ર દ્વારા સાવચેતીનાં પગલાં લેવામાં આવી રહ્યાં છે.
બીજી તરફ, ઉત્તર ભારતના પહાડી વિસ્તારોમાં હિમવર્ષા અને મેદાની વિસ્તારોમાં ઠંડીનો અનુભવ વધી રહ્યો છે. જમ્મુ-કાશ્મીર, હિમાચલ પ્રદેશ અને ઉત્તરાખંડના ઊંચાઈવાળા વિસ્તારોમાં હવામાનમાં ફેરફાર જોવા મળી રહ્યો છે. પહાડોમાંથી આવતા ઠંડા પવનોને કારણે દિલ્હી-NCR, ઉત્તર પ્રદેશ, રાજસ્થાન અને મધ્યપ્રદેશ સહિતના વિસ્તારોમાં સવાર-સાંજ ઠંડીનો અહેસાસ થઈ રહ્યો છે.
