જાપાનઃ જાપાનમાં શનિવારથી શરૂ થનારી એશિયન ગેમ્સ પહેલાં ખેલાડીઓના રહેઠાણને લઈને અવ્યવસ્થાની ફરિયાદો સામે આવી છે. આ વખતે ખર્ચ ઘટાડવા માટે અલગ એથ્લેટ વિલેજ બનાવવામાં આવ્યું નથી. ખેલાડીઓના રોકાણ માટે ક્રૂઝ શિપ, અસ્થાયી રૂમ અને હોટેલોમાં વ્યવસ્થા કરવામાં આવી છે.
રહેઠાણની વ્યવસ્થામાં રૂમ ફાળવણીથી લઈને ભોજન અને પરિવહન સુધીની સમસ્યાઓ અંગે કેટલાક દેશોના ખેલાડીઓએ ફરિયાદો કરી છે. ભારત સહિત વિવિધ દેશોના ખેલાડીઓને મુશ્કેલીનો સામનો કરવો પડી રહ્યો છે. કેટલાક ખેલાડીઓને રૂમ ઉપલબ્ધ ન થતાં જમીન પર સૂઈને રાત વિતાવવી પડી હોવાના અહેવાલો છે.
ભારતીય રોઇંગ ટીમ નાગોયા પહોંચ્યા બાદ ક્રૂઝ શિપ પર રૂમની ફાળવણી માટે લગભગ 14 કલાક સુધી રાહ જોવી પડી હતી. કેટલાક ખેલાડીઓને મોડી રાત્રે રૂમ મળ્યા હતા, જ્યારે તેમને રૂમ શેર કરવા માટે પણ કહેવામાં આવ્યું હતું. આશરે 35 ભારતીય ખેલાડીઓને રહેઠાણ સંબંધિત મુશ્કેલીનો સામનો કરવો પડ્યો હોવાનું જણાવાયું છે.
રહેઠાણ ઉપરાંત ભોજનની વ્યવસ્થાને લઈને પણ ફરિયાદો સામે આવી છે. ખેલાડીઓને પાણી ઉપલબ્ધ કરાવવામાં આવ્યું હતું, પરંતુ કેટલાક સમયે ભોજન ન મળતાં ભારતીય ખેલાડીઓએ સાથે લાવેલા ખોરાકથી ભૂખ સંતોષવી પડી હતી.
આ સમસ્યા માત્ર ભારતીય દળ પૂરતી સીમિત રહી નથી. વિયેતનામ, ચીન, દક્ષિણ કોરિયા અને થાઈલેન્ડ સહિતના દેશોના ખેલાડીઓને પણ અસ્થાયી રહેઠાણની વ્યવસ્થામાં મુશ્કેલી પડી હોવાના અહેવાલો છે. એથ્લેટ વિલેજના બદલે કરવામાં આવેલી વૈકલ્પિક વ્યવસ્થાઓને કારણે આયોજકો સામે તૈયારીઓ અને વ્યવસ્થાપન અંગે સવાલો ઉઠ્યા છે.
