મેરઠઃ ભારતીય વાયુસેનાની એરોબેટિક ટીમ ‘સૂર્યકિરણ’ દ્વારા ઉત્તર પ્રદેશના મેરઠમાં બે દિવસીય એર શોનો પ્રારંભ થયો છે. મોહિઉદ્દીનપુર ઈન્ટિગ્રેટેડ ટાઉનશિપ પરિસરમાં આયોજિત આ એર શો દરમિયાન વાયુસેનાના જાંબાઝ પાયલોટો હવામાં વિવિધ એરોબેટિક્સ કરતબો રજૂ કરી રહ્યા છે. આ શો આવતીકાલ સુધી ચાલશે.
આજે સવારે સૂર્યકિરણ ટીમના વિમાનોએ આકાશમાં અદ્ભુત ઉડાન ભરીને ઉપસ્થિત લોકોને રોમાંચિત કર્યા હતા. સવારે 9 વાગ્યે હોક Mk-132 પ્રકારના વિમાનોએ અંદાજે 35 મિનિટ સુધી વિવિધ એરોબેટિક્સ કરતબોનું પ્રદર્શન કર્યું હતું.
એર શો દરમિયાન લૂપ, હાર્ટ, બેરલ રોલ, ઊંધી ઉડાન અને DNA મેન્યુવર સહિતના વિવિધ કરતબો રજૂ કરવામાં આવ્યા હતા. વિમાનોમાંથી નીકળતી ત્રિરંગા રંગની ધુમાડાની લકીરોથી આકાશમાં આકર્ષક દૃશ્ય સર્જાયું હતું.
સૂર્યકિરણ ભારતીય વાયુસેનાની પ્રખ્યાત એરોબેટિક ટીમ છે. આ શોની ખાસિયત એ છે કે મેરઠના જ ત્રણ વાયુસેના પાયલોટો પણ ટીમનો ભાગ બનીને પ્રદર્શન કરી રહ્યા છે.
એર શો માટે અંદાજે 100 એકર વિસ્તારમાં તૈયારીઓ કરવામાં આવી છે. સુરક્ષાને ધ્યાનમાં રાખીને સમગ્ર વિસ્તારમાં ડ્રોન ઉડાવવા પર પ્રતિબંધ મૂકવામાં આવ્યો છે. કેટલીક જગ્યાએ વાહનવ્યવહાર માટે રસ્તાઓ પણ બંધ કરવામાં આવ્યા છે. ભારતીય વાયુસેનાની હવાઈ ક્ષમતાના આ પ્રદર્શનને નિહાળવા મોટી સંખ્યામાં લોકો ઉમટી રહ્યા છે.
