19થી વધુ લોકો ફસાયા હોવાની આશંકા; ઝેરી ગેસને કારણે બચાવ કામગીરીમાં ભારે પડકાર
ગંગટોક: સિક્કિમના દક્ષિણ જિલ્લામાં નિર્માણાધીન સમારડુંગ સુરંગમાં ભૂસ્ખલન બાદ મિથેન ગેસ લીક થતાં મોટી દુર્ઘટના સર્જાઈ છે. આ ઘટનામાં અત્યાર સુધી 8 મજૂરોના મોત થયા છે, જ્યારે અંદર હજુ 19થી વધુ લોકો ફસાયેલા હોવાની આશંકા વચ્ચે યુદ્ધના ધોરણે બચાવ કામગીરી હાથ ધરવામાં આવી છે.
પ્રાપ્ત માહિતી અનુસાર, આ સુરંગ તીસ્તા સ્ટેજ-6 જલવિદ્યુત પરિયોજના હેઠળ પટેલ એન્જિનિયરિંગ કંપની દ્વારા બનાવવામાં આવી રહી હતી. અકસ્માત બાદ મૃતકોના મૃતદેહોને ગંગટોકની સિંગતમ જિલ્લા હોસ્પિટલ અને નમચી જિલ્લા હોસ્પિટલમાં ખસેડવામાં આવ્યા છે.
ઘટના બાદ NDRF, SDRF, સિક્કિમ પોલીસ, ફાયર બ્રિગેડ, સ્વાસ્થ્ય વિભાગ અને અન્ય સરકારી એજન્સીઓ દ્વારા સંયુક્ત બચાવ અભિયાન શરૂ કરવામાં આવ્યું છે. જોકે સુરંગમાં મિથેન ગેસનું ઊંચું પ્રમાણ હોવાથી બચાવ ટીમો માટે અંદર પ્રવેશવું અત્યંત જોખમી બન્યું છે.
નમચી જિલ્લા કલેક્ટર અનુપા તામલિંગના જણાવ્યા મુજબ, સુરંગમાં અંદાજે 27 કર્મચારીઓ હાજર હોવાની શક્યતા છે. જોકે સુરંગની અંદરની સ્થિતિ અંગે હજુ સ્પષ્ટ માહિતી મળી નથી, જેના કારણે ફસાયેલા લોકોની ચોક્કસ સંખ્યાની સત્તાવાર પુષ્ટિ થઈ શકી નથી.
કલેક્ટરે જણાવ્યું હતું કે NDRFની વિશેષ ટીમ સુરંગમાં પ્રવેશીને બચાવ કામગીરીમાં લાગી ગઈ છે. પ્રશાસન હાલમાં ભૂસ્ખલનનું ચોક્કસ કારણ શોધી રહ્યું છે. મિથેન ગેસના લીકેજને કારણે સમગ્ર ઓપરેશન અત્યંત પડકારજનક બન્યું છે અને દરેક પગલું ખાસ સાવચેતી સાથે ભરવામાં આવી રહ્યું છે.
