બંગાળની ખાડી: બંગાળની ખાડીમાં રોહિંગ્યા શરણાર્થીઓને લઈ જતી બે બોટ પલટી જતાં મોટી દરિયાઈ દુર્ઘટના સર્જાઈ છે. પ્રાથમિક અહેવાલો અનુસાર આ અકસ્માતમાં 500થી વધુ લોકોના મોતની આશંકા વ્યક્ત કરવામાં આવી રહી છે, જ્યારે અનેક લોકો હજુ પણ લાપતા હોવાનું જણાવાઈ રહ્યું છે.
મળતી માહિતી મુજબ બંને બોટોમાં મોટી સંખ્યામાં રોહિંગ્યા શરણાર્થીઓ સવાર હતા. ખરાબ હવામાન, ઊંચા મોજાં અને બોટમાં ક્ષમતા કરતાં વધુ મુસાફરો હોવાના કારણે આ દુર્ઘટના સર્જાઈ હોવાનું પ્રાથમિક તપાસમાં સામે આવ્યું છે.
ઘટનાની જાણ થતાં સ્થાનિક દરિયાઈ સુરક્ષા દળો અને બચાવ ટીમો તાત્કાલિક ઘટનાસ્થળે પહોંચી ગઈ હતી. સમુદ્રમાં સર્ચ અને રેસ્ક્યૂ ઓપરેશન હાથ ધરવામાં આવ્યું છે અને અત્યાર સુધીમાં કેટલાક લોકોને જીવતા બહાર કાઢવામાં આવ્યા છે. જોકે, હજુ પણ મોટી સંખ્યામાં લોકો ગુમ હોવાનું માનવામાં આવી રહ્યું છે.
આ દુર્ઘટના બાદ આંતરરાષ્ટ્રીય માનવાધિકાર સંસ્થાઓએ ચિંતા વ્યક્ત કરી છે અને બચાવ કામગીરી ઝડપી બનાવવા અપીલ કરી છે. અધિકારીઓ દ્વારા મૃતકો અને બચાવાયેલા લોકોની સત્તાવાર સંખ્યા અંગે સતત માહિતી એકત્રિત કરવામાં આવી રહી છે.
રેસ્ક્યૂ ઓપરેશન હજુ પણ ચાલુ હોવાથી જાનહાનિનો આંકડો વધવાની શક્યતા નકારી શકાય તેમ નથી.
