નવી દિલ્હી: દેશની અગ્રણી અવકાશ સંશોધન સંસ્થા **ઈન્ડિયન સ્પેસ રિસર્ચ ઓર્ગેનાઈઝેશન (ISRO)**માંથી છેલ્લા એક વર્ષ દરમિયાન અંદાજે 120 વૈજ્ઞાનિકોએ રાજીનામા અથવા સ્વૈચ્છિક નિવૃત્તિ લીધી હોવાનું સામે આવતાં સરકારનું ધ્યાન આ મુદ્દા તરફ ગયું છે. ગગનયાન, ચંદ્રયાન-4 અને ભારતના ભાવિ અવકાશ મિશનો વચ્ચે અનુભવી વૈજ્ઞાનિકોના પ્રસ્થાનને લઈને ચર્ચા તેજ બની છે.
મળતી માહિતી મુજબ ઈસરોના વિવિધ કેન્દ્રોમાં કાર્યરત વૈજ્ઞાનિકો અને ટેકનિકલ અધિકારીઓએ છેલ્લા એક વર્ષ દરમિયાન પોતાની સેવાઓમાંથી નિવૃત્તિ અથવા રાજીનામું પસંદ કર્યું છે. જોકે, સત્તાવાર રીતે ચોક્કસ આંકડો જાહેર કરવામાં આવ્યો નથી, પરંતુ અંદાજે 100થી 120 જેટલા અધિકારીઓ સંસ્થામાંથી વિદાય લીધા હોવાનું માનવામાં આવે છે.
હાલમાં ઈસરો ગગનયાન, ચંદ્રયાન-4, નવી પેઢીના લોન્ચ વ્હીકલ્સ અને ભાવિ સ્પેસ સ્ટેશન જેવા અનેક મહત્વાકાંક્ષી પ્રોજેક્ટ પર કામ કરી રહ્યું છે. આવી સ્થિતિમાં અનુભવી વૈજ્ઞાનિકોના પ્રસ્થાનથી પ્રોજેક્ટની કામગીરી પર અસર ન થાય તે માટે સરકાર અને સંસ્થા બંને સજાગ બન્યા છે.
સૂત્રોના જણાવ્યા અનુસાર, ઈસરો દ્વારા આંતરિક સ્તરે સૂચના આપવામાં આવી છે કે રાષ્ટ્રીય મહત્વના મિશન સાથે જોડાયેલા અધિકારીઓ પ્રોજેક્ટ પૂર્ણ થાય તે પહેલાં અચાનક જવાબદારી ન છોડે. સરકારે પણ આ મુદ્દે જરૂરી વહીવટી પ્રક્રિયાઓ વધુ કડક બનાવવા સૂચનો આપ્યા હોવાનું કહેવાય છે.
રાજીનામું આપનારા કેટલાક વૈજ્ઞાનિકો લોન્ચ વ્હીકલ, ચંદ્રયાન અને અન્ય મહત્વપૂર્ણ અવકાશ કાર્યક્રમો સાથે સંકળાયેલા રહ્યા હોવાનું પણ જાણવા મળ્યું છે. જોકે, તેમના સ્થાને નવી ટીમો તૈયાર કરવામાં આવી રહી હોવાનું અધિકારીઓનું કહેવું છે.
ઈસરોના અધ્યક્ષ ડૉ. વી. નારાયણને આ મુદ્દે જણાવ્યું હતું કે કોઈપણ મોટી સંસ્થામાં કર્મચારીઓનું આવવું-જવું સામાન્ય પ્રક્રિયા છે અને તેનાથી સંસ્થાના મિશનો પર કોઈ નકારાત્મક અસર નહીં પડે. તેમણે વિશ્વાસ વ્યક્ત કર્યો કે અનુભવી ટીમો અને નવી પેઢીના વૈજ્ઞાનિકો સાથે ઈસરો પોતાના તમામ નિર્ધારિત કાર્યક્રમો સમયસર પૂર્ણ કરશે.
ઉલ્લેખનીય છે કે ભૂતકાળમાં પણ ઈસરોમાંથી મોટી સંખ્યામાં વૈજ્ઞાનિકોએ નિવૃત્તિ અથવા રાજીનામું આપ્યું હતું, છતાં સંસ્થાએ નવા વૈજ્ઞાનિકોને તૈયાર કરીને પોતાના તમામ મહત્વપૂર્ણ અવકાશ મિશનો સફળતાપૂર્વક પૂર્ણ કર્યા હતા.
