અમેરિકામાં H-1B વિઝા કાર્યક્રમને લઈને ટ્રમ્પ વહીવટીતંત્રની કાર્યવાહી વધુ કડક બની રહી છે. અમેરિકી શ્રમ વિભાગના ઇન્સ્પેક્ટર જનરલ એન્થની ડી’એસ્પોસિટોએ તાજેતરના ઇન્ટરવ્યુમાં કહ્યું છે કે આગામી 365 દિવસમાં વિદેશી શ્રમ વિઝા કાર્યક્રમનું સ્વરૂપ આજની સરખામણીએ ઘણું અલગ હોઈ શકે છે. આ નિવેદનને H-1B વ્યવસ્થામાં મોટા ફેરફારોના સંકેત તરીકે જોવામાં આવી રહ્યું છે.
જોકે, હાલમાં H-1B વિઝા સંપૂર્ણપણે બંધ કરવાની કોઈ સત્તાવાર જાહેરાત કરવામાં આવી નથી. અમેરિકી સરકારે હાલમાં કાર્યક્રમમાં છેતરપિંડી અને દુરુપયોગ સામે તપાસ તથા અમલવારી વધુ કડક કરી છે. સપ્ટેમ્બર 2025થી શરૂ થયેલા Project Firewall હેઠળ H-1B નિયમોના ઉલ્લંઘન, અમેરિકી કર્મચારીઓના વિસ્થાપન અને ખોટી માહિતી આપતી અરજીઓ અંગે તપાસને પ્રાથમિકતા આપવામાં આવી રહી છે.
ભારતીય IT પ્રોફેશનલ્સ પર કેમ અસર થઈ શકે?
H-1B કાર્યક્રમ અમેરિકી કંપનીઓને વિશિષ્ટ કુશળતા ધરાવતા વિદેશી કર્મચારીઓને નોકરી પર રાખવાની મંજૂરી આપે છે. તેથી નિયમોમાં કડકાઈ વધે તો અમેરિકામાં કામ કરતા અથવા ત્યાં નોકરી મેળવવાની તૈયારી કરી રહેલા વિદેશી ટેક પ્રોફેશનલ્સ માટે અરજી અને રોજગાર પ્રક્રિયા વધુ મુશ્કેલ બની શકે છે.
અમેરિકી શ્રમ વિભાગના જણાવ્યા મુજબ Project Firewall હેઠળ નોકરીદાતાઓ દ્વારા અમેરિકી કર્મચારીઓને દૂર કરીને H-1B કર્મચારીઓને પ્રાધાન્ય આપવું, અમેરિકી કર્મચારીઓની ભરતી માટે યોગ્ય પ્રયાસ ન કરવો અથવા નોકરી અંગે ખોટી માહિતી આપવી જેવી બાબતોની તપાસ થઈ શકે છે.
H-1B પર નવી એન્ટ્રી પાબંદી
18 સપ્ટેમ્બર 2026ના વ્હાઇટ હાઉસના આદેશ મુજબ H-1B હેઠળ અમેરિકાની બહારથી આવનારા કેટલાક નવા કામદારોની એન્ટ્રી પર અગાઉ લાગુ કરાયેલી મર્યાદા 21 સપ્ટેમ્બર 2027 સુધી લંબાવવામાં આવી છે. આ મર્યાદા હેઠળ સંબંધિત અરજીઓ સાથે $100,000ની ચુકવણીની જોગવાઈ છે, જોકે તેમાં કેટલીક અપવાદની જોગવાઈ પણ રાખવામાં આવી છે.
H-1B વિઝાનો કોટા કેટલો?
અમેરિકી કાયદા હેઠળ સામાન્ય કેટેગરીમાં દર નાણાકીય વર્ષમાં 65,000 H-1Bની મર્યાદા છે. અમેરિકાની ઉચ્ચ શિક્ષણ સંસ્થામાંથી માસ્ટર્સ અથવા તેનાથી ઉચ્ચ ડિગ્રી મેળવનારા ઉમેદવારો માટે વધારાના 20,000 વિઝાનો એડવાન્સ્ડ-ડિગ્રી કોટા છે.
આથી હાલમાં ઉપલબ્ધ સત્તાવાર માહિતી મુજબ H-1B કાર્યક્રમ સંપૂર્ણપણે ખતમ થઈ રહ્યો છે એવું કહેવું વહેલું છે; પરંતુ અમેરિકી સરકાર દ્વારા તપાસ, અમલવારી અને એન્ટ્રી નિયમોમાં નોંધપાત્ર કડકાઈ કરવામાં આવી રહી છે.
