દેશી પિસ્તોલ અને જીવતા કારતૂસ સાથે ક્રાઇમ બ્રાન્ચની કાર્યવાહી; હથિયાર સપ્લાય ચેઇનની કડીઓ સુધી પહોંચવા તપાસ તેજ
રાજકોટ: રાજકોટ શહેર પોલીસ દ્વારા ગેરકાયદેસર હથિયારો સામે ચલાવવામાં આવી રહેલી વિશેષ ઝુંબેશને મોટી સફળતા મળી છે. શહેર ક્રાઇમ બ્રાન્ચ અને પીસીબીએ માત્ર 12 દિવસમાં 42 ગેરકાયદેસર હથિયારો અને અનેક જીવતા કારતૂસ જપ્ત કરીને હથિયાર સપ્લાય નેટવર્કને મોટો ફટકો પહોંચાડ્યો છે.
આ ઝુંબેશ દરમિયાન ક્રાઇમ બ્રાન્ચે વધુ એક સફળ કાર્યવાહી કરતાં **ઘાંચીવાડના કુખ્યાત અરબાઝ અલ્તાફ દોઢીયા (ઉ.વ. 28)**ને દેશી બનાવટની પિસ્તોલ અને એક જીવતા કારતૂસ સાથે ઝડપી પાડ્યો હતો. બાતમીના આધારે ઘાંચીવાડ વિસ્તારમાં નદી કાંઠે આવેલા ઘોડાના તબેલા નજીકથી આરોપીની ધરપકડ કરવામાં આવી હતી.
પોલીસ કમિશનર બ્રજેશકુમાર ઝા, એડિશનલ પોલીસ કમિશનર ચૈતન્ય મંડલીક, ડીસીપી (ક્રાઇમ) જગદીશ બાંગરવા અને એસીપી (ક્રાઇમ) ભરત બસીયાના માર્ગદર્શન હેઠળ ક્રાઇમ બ્રાન્ચની ટીમે સમગ્ર ઓપરેશન સફળતાપૂર્વક પાર પાડ્યું હતું.
ઝડપાયેલા આરોપી સામે આર્મ્સ એક્ટ હેઠળ ગુનો નોંધી વધુ તપાસ હાથ ધરવામાં આવી છે. પ્રાથમિક પૂછપરછ દરમિયાન અરબાઝે ઓડિયો ગેંગ સાથેની જૂની દુશ્મનાવટને કારણે સ્વબચાવ માટે હથિયાર રાખ્યાનું પોલીસ સમક્ષ કબૂલ્યું હોવાનું જાણવા મળ્યું છે.
હવે પોલીસ આરોપીને હથિયાર કોણે પૂરું પાડ્યું, તેની પાછળ કાર્યરત સપ્લાય ચેઇન અને અન્ય સંડોવાયેલા શખ્સો સુધી પહોંચવા માટે રિમાન્ડ મેળવવાની કાર્યવાહી કરી રહી છે. પોલીસના જણાવ્યા મુજબ અરબાઝ દોઢીયા અગાઉ પણ અનેક ગંભીર ગુનાઓમાં સંડોવાયેલો હોવાથી તેની ગુનાહિત પ્રવૃત્તિઓની પણ ઊંડાણપૂર્વક તપાસ ચાલી રહી છે.
