વધતા ઉત્પાદન ખર્ચની અસર; FMCG, ઇલેક્ટ્રોનિક્સ અને ઓટોમોબાઈલ સેક્ટરમાં 6થી 8% સુધી ભાવવધારાની તૈયારી
નવી દિલ્હી: ઓગસ્ટ મહિનાની શરૂઆતથી જ સામાન્ય લોકોના ખિસ્સા પર મોંઘવારીનો વધુ એક માર પડવાનો છે. કાચા માલના ભાવમાં વધારો, દરિયાઈ માલવાહક ભાડાંમાં થયેલી તેજી અને રૂપિયાના અવમૂલ્યનને કારણે અનેક મોટી કંપનીઓએ પોતાની પ્રોડક્ટ્સના ભાવ વધારવાનો નિર્ણય લીધો છે. આગામી દિવસોમાં ચા, હેર ઓઈલ, ટીવી, રેફ્રિજરેટર, બ્રાન્ડેડ કપડાં અને કાર સહિત અનેક વસ્તુઓ 6થી 8 ટકા સુધી મોંઘી થઈ શકે છે.
ઇલેક્ટ્રોનિક્સ ક્ષેત્રમાં ટીવી, રેફ્રિજરેટર અને વોશિંગ મશીનના ભાવમાં ફરી વધારો થશે. બીજી તરફ ઓટોમોબાઈલ ક્ષેત્રમાં મારુતિ સુઝુકી કેટલીક કારોના ભાવમાં ₹30,000 સુધીનો વધારો કરશે, જ્યારે હોન્ડા અને અન્ય કંપનીઓ પણ નવા ભાવ જાહેર કરવાની તૈયારીમાં છે.
ફેશન અને FMCG સેક્ટરમાં પણ કાચા માલ, ખાદ્ય તેલ અને પેકેજિંગ ખર્ચમાં વધારાને કારણે બ્રાન્ડેડ કપડાં તેમજ રોજિંદા વપરાશની અનેક વસ્તુઓના ભાવમાં વધારો થવાનો છે. કંપનીઓ તહેવારોની ખરીદી શરૂ થાય તે પહેલાં જ નવા ભાવ અમલમાં મૂકવાની તૈયારીમાં છે.
