યુક્રેનના ડ્રોન હુમલાથી રશિયાની રિફાઇનરીઓમાં ઉત્પાદન ઘટ્યું, વિદેશી પેટ્રોલની આયાત વધી
નવી દિલ્હી: યુક્રેનના સતત ડ્રોન હુમલાઓને કારણે રશિયાની અનેક રિફાઇનરીઓમાં ઇંધણનું ઉત્પાદન ખોરવાયું છે. સ્થાનિક પેટ્રોલનું ઉત્પાદન ઘટતાં રશિયાએ હવે વિદેશમાંથી મોટા પ્રમાણમાં પેટ્રોલ આયાત કરવાનું શરૂ કર્યું છે. ભારત, તુર્કીયે અને મોરક્કો રશિયાને પેટ્રોલ સપ્લાય કરતા મુખ્ય દેશોમાં સામેલ છે.
ભારતે બે મહિનામાં 10 લાખ બેરલ પેટ્રોલ મોકલ્યું
છેલ્લા બે મહિનામાં ભારતે રશિયાને આશરે 10 લાખ બેરલ પેટ્રોલની સપ્લાય કરી છે. આ સપ્લાયમાં ગુજરાતની વાડિનાર રિફાઇનરીની મહત્વની ભૂમિકા રહી છે.
વાડિનાર રિફાઇનરીનું સંચાલન ન્યારા એનર્જી કરે છે. કંપનીમાં રશિયાની રોસનેફ્ટની 50 ટકા ભાગીદારી છે. જેના કારણે રશિયાને પેટ્રોલની સપ્લાયમાં વાડિનાર રિફાઇનરી મહત્વનું કેન્દ્ર બની છે.
રશિયાની પેટ્રોલ આયાત રેકોર્ડ સ્તરે
ઓગસ્ટ દરમિયાન રશિયાની દરિયાઈ માર્ગે પેટ્રોલ આયાત વધીને દરરોજ 1.25 લાખ બેરલના રેકોર્ડ સ્તરે પહોંચી હતી. સમગ્ર મહિના દરમિયાન રશિયાએ આશરે 4.7 લાખ ટન પેટ્રોલની આયાત કરી હોવાનું જણાવાયું છે.
ડ્રોન હુમલાઓને કારણે રશિયન રિફાઇનરીઓનું સ્થાનિક પેટ્રોલ ઉત્પાદન 70 ટકા સુધી ઘટી ગયું છે. ઉત્પાદન ઘટતાં દેશની સ્થાનિક માંગ પૂરી કરવા માટે આયાત પર આધાર વધ્યો છે.
પ્રતિબંધિત જહાજોનો ઉપયોગ
ઓગસ્ટમાં રશિયાની કુલ પેટ્રોલ આયાતમાંથી આશરે 55 ટકા પેટ્રોલ પ્રતિબંધિત કાફલાના જહાજો દ્વારા રશિયા પહોંચ્યું હતું.
ભારતથી રશિયા મોકલાયેલા પેટ્રોલના કાર્ગો પણ આવા જહાજો દ્વારા પહોંચાડવામાં આવ્યા હતા. પેટ્રોલને સીધું રશિયા લઈ જવાને બદલે ભૂમધ્ય સાગરમાં એક જહાજમાંથી બીજા જહાજમાં ટ્રાન્સફર કરવામાં આવ્યું અને ત્યારબાદ રશિયા પહોંચાડવામાં આવ્યું હતું.
બે મહિનામાં 32 ડ્રોન હુમલા
છેલ્લા બે મહિનામાં રશિયન રિફાઇનરીઓને નિશાન બનાવીને આશરે 32 ડ્રોન હુમલા થયા છે. હુમલાઓના કારણે રિફાઇનરીઓમાં પેટ્રોલ અને અન્ય ઇંધણના ઉત્પાદન પર ગંભીર અસર પડી છે.
સ્થાનિક ઉત્પાદન ઘટતા રશિયાને પોતાની પેટ્રોલ જરૂરિયાત પૂરી કરવા માટે વિદેશી સપ્લાય પર આધાર રાખવો પડી રહ્યો છે. આ સ્થિતિમાં ભારત રશિયાને પેટ્રોલ પહોંચાડનારા સૌથી મહત્વપૂર્ણ સપ્લાયરોમાં એક બની ગયું છે.
