સતત વાદળછાયા વાતાવરણ અને છૂટાછવાયા ઝાપટાંથી ગરમીથી રાહત; સૂર્યદેવના દર્શન દુર્લભ રહ્યા
રાજકોટ: શહેરમાં છેલ્લા કેટલાક દિવસોથી યથાવત વરસાદી માહોલ વચ્ચે આજે પણ દિવસભર ઝરમર અને છૂટાછવાયા વરસાદી ઝાપટાં વરસતા રહ્યા હતા. સતત વાદળછાયા વાતાવરણને કારણે શહેરમાં ઠંડકનો અહેસાસ થયો હતો અને લોકોને ગરમી તથા ઉકળાટમાંથી રાહત મળી હતી.
સવારથી જ આકાશ ઘેરા વાદળોથી છવાયેલું રહ્યું હતું. શહેરના વિવિધ વિસ્તારોમાં સમયાંતરે હળવાથી મધ્યમ વરસાદ વરસતા દિવસભર સૂર્યદેવના દર્શન દુર્લભ રહ્યા હતા.
સ્થાનિક હવામાન કચેરીના જણાવ્યા મુજબ બપોરે 2:30 વાગ્યે રાજકોટનું મહત્તમ તાપમાન માત્ર 26.8 ડિગ્રી સેલ્સિયસ નોંધાયું હતું, જે સામાન્ય કરતાં નોંધપાત્ર રીતે ઓછું રહ્યું હતું. આ સમયે હવામાં 92 ટકા ભેજ અને પવનની સરેરાશ 12 કિલોમીટર પ્રતિ કલાકની ઝડપ નોંધાઈ હતી.
આજે સવારે 8:30 વાગ્યે મહત્તમ તાપમાન 27.4 ડિગ્રી અને લઘુત્તમ તાપમાન 24.4 ડિગ્રી નોંધાયું હતું. સવારે હવામાં ભેજનું પ્રમાણ 84 ટકા હતું, જ્યારે પવનની સરેરાશ ઝડપ 10 કિલોમીટર પ્રતિ કલાક નોંધાઈ હતી.
હવામાન વિભાગના અનુમાન મુજબ આગામી દિવસોમાં પણ રાજકોટ સહિત સૌરાષ્ટ્રના અનેક વિસ્તારોમાં વાદળછાયું વાતાવરણ અને હળવાથી મધ્યમ વરસાદી ઝાપટાંનો માહોલ યથાવત રહેવાની શક્યતા છે.
