‘C-20 નહીં, C-420’ કહી રાહુલ ગાંધીએ કેન્દ્ર સરકારને ઘેરી; ઓઈલ કંપનીઓનો વળતો દાવો, 893 સેમ્પલમાં ઈથેનોલનું પ્રમાણ 19થી 21 ટકા
કર્ણાટકમાં C-20 પેટ્રોલમાં ઈથેનોલના પ્રમાણને લઈને શરૂ થયેલો વિવાદ હવે રાજકીય રંગ પકડી રહ્યો છે. રાજ્ય સરકાર દ્વારા સાત જિલ્લાઓમાં કરવામાં આવેલા પરીક્ષણમાં 14 પેટ્રોલ પંપમાંથી 11ના નમૂના નિષ્ફળ ગયા હોવાનો દાવો કરવામાં આવ્યો છે. આ નમૂનાઓમાં નિર્ધારિત 20 ટકાની સરખામણીએ 30થી 31 ટકા સુધી ઈથેનોલ હોવાનું સામે આવ્યું હોવાનો અહેવાલ છે. આ મુદ્દે કોંગ્રેસના નેતા રાહુલ ગાંધીએ કેન્દ્ર સરકાર પર સીધો પ્રહાર કરતાં C-20ને ‘C-420’ ગણાવી ગ્રાહકો સાથે છેતરપિંડી થતી હોવાનો આક્ષેપ કર્યો છે.
રાહુલ ગાંધીનો સરકાર પર આકરો પ્રહાર
રાહુલ ગાંધીએ આ મામલે સરકારી અને ખાનગી ઓઈલ કંપનીઓની કામગીરી સામે સવાલો ઉઠાવ્યા છે. તેમના જણાવ્યા મુજબ, કર્ણાટકમાં પેટ્રોલ પંપ પરથી લેવામાં આવેલા નમૂનાઓ લેબોરેટરી પરીક્ષણમાં નિષ્ફળ ગયા છે. તેમણે આ ઘટનાને જનતાની ગાડીમાંથી પેટ્રોલની ચોરી સમાન ગણાવી હતી.
રાહુલ ગાંધીએ આક્ષેપ કર્યો હતો કે ગ્રાહકો પેટ્રોલના ઊંચા ભાવ ચૂકવી રહ્યા છે, પરંતુ તેમને તેના બદલે વધુ પ્રમાણમાં ઈથેનોલ મિશ્રિત ઈંધણ આપવામાં આવી રહ્યું છે. સામાન્ય ગ્રાહકો પાસે આ અંગે કોઈ વિકલ્પ ન હોવાનો દાવો કરતાં તેમણે સરકારની જવાબદારી પર પણ સવાલ ઉઠાવ્યા હતા.
વડાપ્રધાન મોદીને સીધો સવાલ
રાહુલ ગાંધીએ વડાપ્રધાન નરેન્દ્ર મોદીને સવાલ કરતાં પૂછ્યું હતું કે દેશના નાગરિકોની ગાડીની ટાંકીમાં કયું ઈંધણ ભરવામાં આવી રહ્યું છે? તેમાં કેટલા ટકા પેટ્રોલ અને કેટલા ટકા ઈથેનોલ છે? તેમણે કહ્યું કે ગ્રાહકોને ઈંધણની વાસ્તવિક સ્થિતિ અંગે સ્પષ્ટ માહિતી મળવી જોઈએ.
કર્ણાટકના 14 પેટ્રોલ પંપમાંથી 11ના નમૂના નિષ્ફળ ગયાના દાવા સાથે રાહુલ ગાંધીએ ઈન્ડિયન ઓઈલ અને હિન્દુસ્તાન પેટ્રોલિયમ જેવી જાહેર ક્ષેત્રની કંપનીઓ ઉપરાંત ખાનગી ક્ષેત્રની નાયરા અને શેલ કંપનીઓ અંગે પણ સવાલો ઉઠાવ્યા હતા.
ઓઈલ માર્કેટિંગ કંપનીઓએ દાવાઓનો કર્યો વિરોધ
નવી દિલ્હી, તા. 7: કર્ણાટક સરકારના પરીક્ષણમાં પેટ્રોલમાં 20 ટકાથી વધુ ઈથેનોલ હોવાનું સામે આવ્યું હોવાના દાવા બાદ જાહેર ક્ષેત્રની ઓઈલ માર્કેટિંગ કંપનીઓએ પોતાનો પક્ષ રજૂ કર્યો છે. કંપનીઓના જણાવ્યા મુજબ, દેશનાં 27 રાજ્યો અને કેન્દ્રશાસિત પ્રદેશોમાં કુલ 893 નમૂનાઓ એકત્રિત કરીને તેનું લેબોરેટરી પરીક્ષણ કરવામાં આવ્યું હતું.
કંપનીઓનો દાવો છે કે આ તમામ નમૂનાઓમાં ઈથેનોલનું પ્રમાણ 19થી 21 ટકાની વચ્ચે નોંધાયું હતું. આ પરીક્ષણોમાં કર્ણાટકનો પણ સમાવેશ કરવામાં આવ્યો હતો. કંપનીઓએ રાજ્ય સરકાર દ્વારા નમૂનાઓ એકત્રિત કરવાની અને પરીક્ષણ કરવાની પદ્ધતિ સામે પ્રશ્નો ઉઠાવ્યા છે.
વાહનોના ઈંધણ વપરાશ અને રિપેરિંગ ખર્ચ અંગે પણ મતભેદ
C-20 પેટ્રોલના ઉપયોગથી વાહનોના ઈંધણ વપરાશમાં વધારો થાય છે અને રિપેરિંગ પાછળ વધુ ખર્ચ કરવો પડે છે તેવી દલીલને પણ ઓઈલ માર્કેટિંગ કંપનીઓએ નકારી છે. કંપનીઓના જણાવ્યા મુજબ, આ પ્રકારના વધારાના ખર્ચ અંગે કરવામાં આવતા દાવા યોગ્ય નથી.
હવે પરીક્ષણના પરિણામો પર સૌની નજર
કર્ણાટક સરકાર દ્વારા રજૂ કરવામાં આવેલા 14 નમૂનાઓના પરિણામો અને ઓઈલ કંપનીઓ દ્વારા રજૂ કરાયેલા દેશભરના 893 નમૂનાઓના પરિણામો વચ્ચે તફાવત જોવા મળી રહ્યો છે. રાજ્ય સરકારના પરીક્ષણમાં વધુ ઈથેનોલ હોવાનું જણાવાયું છે, જ્યારે કંપનીઓના પરીક્ષણમાં પ્રમાણ 19થી 21 ટકા હોવાનું કહેવાયું છે.
આથી હવે બંને પક્ષોની પરીક્ષણ પદ્ધતિ, નમૂનાઓની વિગતો અને લેબોરેટરીના પરિણામોની પારદર્શક તપાસ મહત્ત્વપૂર્ણ બની છે. આ તપાસ બાદ જ પેટ્રોલમાં ઈથેનોલના વાસ્તવિક પ્રમાણ અને ગ્રાહકોને મળતા ઈંધણ અંગેની સ્થિતિ વધુ સ્પષ્ટ થઈ શકશે.
