હરદોઈમાં બાળકની મુંડન વિધિ પૂર્ણ કરીને પરત ફરી રહેલા પરિવાર પર કાળ બનીને ત્રાટકી ટ્રક; હિંમતનગર નજીક સર્જાયેલી દુર્ઘટનાથી ચકચાર
સીતાપુર: ઉત્તર પ્રદેશના સીતાપુર જિલ્લામાં શુક્રવારે એક હૃદયદ્રાવક માર્ગ અકસ્માતમાં પાંચ મહિલાઓનાં મોત થયાં હતાં, જ્યારે 17 લોકો ઇજાગ્રસ્ત થયા હતા. હરદોઈમાં બાળકની મુંડન વિધિ પૂર્ણ કરીને ટ્રેક્ટર-ટ્રોલીમાં સવાર થઈ પરિવારજનો પરત ફરી રહ્યા હતા. આ દરમિયાન પાછળથી પૂરપાટ ઝડપે આવેલી ટ્રકે ટ્રેક્ટર-ટ્રોલીને જોરદાર ટક્કર મારતાં વાહન રસ્તા પર જ પલટી ખાઈ ગયું હતું. અકસ્માત એટલો ગંભીર હતો કે ટ્રોલીમાં બેઠેલા અનેક લોકો નીચે દબાઈ ગયા હતા.
પાછળથી આવેલી ટ્રકે જોરદાર ટક્કર મારી
પ્રાપ્ત માહિતી અનુસાર, આ દુર્ઘટના સીતાપુર જિલ્લાના પિસાવાં પોલીસ સ્ટેશન વિસ્તાર હેઠળ આવતા હિંમતનગર નજીક બની હતી. હરદોઈમાં ધાર્મિક વિધિ પૂર્ણ કર્યા બાદ પરિવારના સભ્યો ટ્રેક્ટર-ટ્રોલીમાં પોતાના ઘરે પરત ફરી રહ્યા હતા. રસ્તા પર આગળ વધી રહેલી ટ્રેક્ટર-ટ્રોલીને પાછળથી આવેલી ટ્રકે અડફેટે લીધી હતી. ટક્કરના જોરથી ટ્રેક્ટર-ટ્રોલીનું સંતુલન ખોરવાયું અને તે રસ્તા પર ઊંધી વળી ગઈ હતી.
પાંચ મહિલાઓનાં ઘટનાસ્થળે જ મોત
ટ્રોલી પલટી જતાં તેમાં સવાર લોકો એકબીજા પર પડ્યા હતા અને કેટલાક લોકો વાહન નીચે દબાઈ ગયા હતા. આ દુર્ઘટનામાં પાંચ મહિલાઓએ ઘટનાસ્થળે જ જીવ ગુમાવ્યો હતો. જ્યારે 17 જેટલા લોકો ઇજાગ્રસ્ત થતાં તેમને તાત્કાલિક સારવારની જરૂર પડી હતી. અકસ્માત બાદ રસ્તા પર લોકોનાં ટોળાં એકત્ર થઈ ગયાં હતાં અને સમગ્ર વિસ્તારમાં અફરાતફરીનો માહોલ સર્જાયો હતો.
વહીવટી તંત્ર અને પોલીસ ઘટનાસ્થળે પહોંચ્યાં
ઘટનાની જાણ થતાં જ સ્થાનિક પોલીસ અને બચાવ ટીમ તાત્કાલિક સ્થળ પર પહોંચી હતી. ટ્રોલીમાં ફસાયેલા લોકોને બહાર કાઢવા માટે બચાવ કામગીરી હાથ ધરવામાં આવી હતી. જિલ્લા મેજિસ્ટ્રેટ રાજા ગણપતિ આર અને પોલીસ અધિક્ષક અંકુર અગ્રવાલે પણ ઘટનાસ્થળની મુલાકાત લઈને અકસ્માતની સ્થિતિનું નિરીક્ષણ કર્યું હતું.
ઇજાગ્રસ્તોને જિલ્લા હોસ્પિટલમાં સારવાર
અકસ્મતમાં ઘાયલ થયેલા તમામ 17 લોકોને એમ્બ્યુલન્સ મારફતે જિલ્લા હોસ્પિટલમાં ખસેડવામાં આવ્યા હતા. હોસ્પિટલમાં તેમની સારવાર શરૂ કરવામાં આવી છે અને તંત્ર દ્વારા જરૂરી તબીબી સુવિધાઓ ઉપલબ્ધ કરાવવાની વ્યવસ્થા કરવામાં આવી રહી છે. અકસ્માત કેવી રીતે સર્જાયો અને ટ્રકચાલકની ભૂમિકા અંગે પોલીસ દ્વારા તપાસ હાથ ધરવામાં આવી રહી છે.
મુંડન વિધિ જેવા પારિવારિક પ્રસંગ બાદ ઘરે પરત ફરી રહેલા પરિવાર પર આવી દુર્ઘટના તૂટી પડતાં વિસ્તારમાં શોકની લાગણી ફેલાઈ છે. પાંચ મહિલાઓનાં મોતથી પરિવારોમાં માતમ છવાયો છે.
