રસ્તા પર ઊભા રહી વાહનચાલકોને કરે છે ટ્રાફિકના ઇશારા; કેમેરા અને સેન્સરની મદદથી વાહનો પર રાખે છે નજર
બેઇજિંગ: ટેક્નોલોજીના ક્ષેત્રમાં સતત પ્રગતિ કરી રહેલા ચીને હવે ટ્રાફિક વ્યવસ્થાપનમાં પણ રોબોટનો ઉપયોગ શરૂ કર્યો છે. માણસ જેવા દેખાતા હ્યુમનોઇડ રોબોટ રસ્તા પર ટ્રાફિક પોલીસની જેમ ઊભા રહી વાહનચાલકોને ઇશારા કરી રહ્યા છે. આ રોબોટ માત્ર દેખાવ પૂરતા નથી, પરંતુ તેમાં લગાવવામાં આવેલા કેમેરા અને સેન્સરની મદદથી રસ્તા પર પસાર થતાં વાહનો પર પણ નજર રાખી શકે છે.
હાંગઝોઉમાં મેરેથોન દરમિયાન તૈનાત કરાયા રોબોટ
ચીનના હાંગઝોઉ શહેરમાં યોજાયેલી મેરેથોન દરમિયાન પ્રથમ વખત આવા હ્યુમનોઇડ રોબોટને ટ્રાફિક વ્યવસ્થાપનની કામગીરીમાં તૈનાત કરવામાં આવ્યા હતા. રોબોટ રસ્તા પર ઊભા રહીને ટ્રાફિક પોલીસની જેમ વાહનચાલકોને દિશાસૂચક ઇશારા કરતા જોવા મળ્યા હતા. આ પ્રયોગ દ્વારા ટ્રાફિક નિયંત્રણમાં આધુનિક ટેક્નોલોજીનો ઉપયોગ કરવાની દિશામાં નવું પગલું ભરવામાં આવ્યું છે.
વરસાદ અને ભારે ગરમીમાં પણ કામ કરવાની ક્ષમતા
અહેવાલ મુજબ, 178 સેન્ટિમીટર ઊંચાઈ ધરાવતા આ રોબોટને સ્થાનિક ટ્રાફિક પોલીસની કામગીરી માટે વિશેષ તાલીમ આપવામાં આવી છે. તેઓ વરસાદ અને તડકાની પરિસ્થિતિમાં પણ કામ કરી શકે છે. માઇનસ 20 ડિગ્રીથી લઈને 55 ડિગ્રી સેલ્સિયસ સુધીના તાપમાનમાં કામગીરી કરવાની ક્ષમતા હોવાનો દાવો કરવામાં આવ્યો છે.
કેમેરા અને સેન્સરથી વાહનો પર નજર
આ રોબોટમાં લગાવવામાં આવેલા કેમેરા અને સેન્સર રસ્તા પર આવતાં-જતાં વાહનોનું નિરીક્ષણ કરે છે. તેના આધારે રોબોટ ટ્રાફિક સંકેતો આપવાની કામગીરી કરી શકે છે. માણસ જેવા દેખાવ અને ટ્રાફિક પોલીસ જેવી કામગીરીને કારણે આ રોબોટ ચીનમાં ટેક્નોલોજી અને ટ્રાફિક વ્યવસ્થાપનના નવા પ્રયોગ તરીકે ચર્ચામાં આવ્યા છે.
