વારાણસીથી રેલવે પાર્સલ મારફતે બિલ વગર મંગાવાયેલો માલ પોલીસના હાથે લાગ્યો; ઉદય કાર્ગો સર્વિસની ભૂમિકા સામે આવતાં GST વિભાગ સાથે તપાસ શરૂ
રાજકોટ: રાજકોટ રેલવે સ્ટેશન પરથી રેલવે પાર્સલ મારફતે વારાણસીથી મોકલવામાં આવેલો રૂ.14.53 લાખની કિંમતનો 1,321 કિલો કોપરનો જથ્થો રેલવે પોલીસે ઝડપી પાડ્યો છે. પ્રાથમિક તપાસમાં આ જથ્થો રાજકોટના સંત કબીર રોડ પર આવેલી ઉદય કાર્ગો સર્વિસના સંચાલક પ્રકાશભાઈ દ્વારા મંગાવવામાં આવ્યો હોવાનું સામે આવ્યું છે. GSTની ભરપાઈ ટાળવા માટે જરૂરી બિલ વગર આ માલ મંગાવવામાં આવ્યો હોવાની આશંકા વચ્ચે પોલીસે કોપરનો જથ્થો શક પડતી મિલકત તરીકે કબજે કરી GST વિભાગને સાથે રાખીને વધુ તપાસ હાથ ધરી છે.
બાતમીના આધારે પાર્સલની તપાસ કરતાં કોપરનો જથ્થો મળ્યો
આગામી દિવાળીના તહેવારોને ધ્યાનમાં રાખીને રેલવે પોલીસ દ્વારા ટ્રેનો અને પાર્સલ મારફતે દારૂ, માદક પદાર્થો તથા અન્ય શંકાસ્પદ વસ્તુઓની હેરાફેરી અટકાવવા વિશેષ તપાસ હાથ ધરવામાં આવી હતી. પશ્ચિમ રેલવેના અધિક મહાનિર્દેશક કે.એન. ડામોર અને એસપી યશપાલ જગાણીયાના માર્ગદર્શન હેઠળ ઇન્ચાર્જ ડીવાયએસપી એચ.એમ. રાણાની રાહબરીમાં પીએસઆઇ બી.જે. જાડેજા, કે.યુ. વાળા સહિતની ટીમ તપાસમાં જોડાઈ હતી.
દરમિયાન કોન્સ્ટેબલ દેવેન્દ્રભાઈ અને સાગરભાઈને રેલવે પાર્સલ મારફતે શંકાસ્પદ વસ્તુની હેરફેર થતી હોવાની બાતમી મળી હતી. જેના આધારે પોલીસની ટીમે પાર્સલની તપાસ કરતાં રૂ.14,53,100ની કિંમતનો 1,321 કિલો કોપરનો જથ્થો મળી આવ્યો હતો. પોલીસે આ જથ્થો કબજે કરીને તેની હેરફેર અંગે તપાસ શરૂ કરી હતી.
ઉદય કાર્ગો સર્વિસ મારફતે માલ મંગાવાયો હોવાનું ખુલ્યું
પોલીસ સૂત્રોના જણાવ્યા અનુસાર, તપાસ દરમિયાન વારાણસીથી મોકલવામાં આવેલો કોપરનો જથ્થો રાજકોટના સંત કબીર રોડ પર આવેલી ઉદય કાર્ગો સર્વિસ દ્વારા મંગાવવામાં આવ્યો હોવાનું જાણવા મળ્યું છે. આ માલ સાથે જરૂરી બિલ ન હોવાની બાબત પણ સામે આવી છે. GSTની ભરપાઈ ટાળવાના હેતુથી બિલ વગર માલ મંગાવવામાં આવ્યો હોવાની આશંકા છે. આથી પોલીસે GST વિભાગ સાથે સંકલન કરીને દસ્તાવેજો અને માલની હેરફેર અંગે વધુ તપાસ હાથ ધરી છે.
ઉદય કાર્ગોની લીઝ પર તપાસની શક્યતા
ઉદય કાર્ગો સર્વિસ પાસે રેલવેના પાર્સલ વિભાગમાં લીઝ હોવાનું જાણવા મળ્યું છે. પોલીસ સૂત્રોના જણાવ્યા મુજબ, આશરે બે મહિના પહેલાં પણ આ કાર્ગો સર્વિસ મારફતે શંકાસ્પદ ધાતુનો જથ્થો ઝડપાયો હતો. અગાઉના બનાવ અને હાલના કેસને ધ્યાનમાં રાખીને કાર્ગો સર્વિસની કામગીરી અંગે પણ તપાસ થઈ શકે છે.
જો તપાસ દરમિયાન નિયમોના ભંગની પુષ્ટિ થશે તો ઉદય કાર્ગો સર્વિસની રેલવે પાર્સલ વિભાગની લીઝ રદ કરવા અંગેની કાર્યવાહી થવાની શક્યતા છે. જોકે, આ અંગેનો અંતિમ નિર્ણય રેલવેના સંબંધિત સત્તાધિકારીઓ દ્વારા લેવામાં આવશે.
રેલવે પોલીસની ટીમે હાથ ધરી કામગીરી
આ કામગીરીમાં રાજકોટ રેલવે પોલીસના એએસઆઇ શક્તિસિંહ, હેડ કોન્સ્ટેબલ સાગરભાઈ, મેહુલભાઈ, મનસુખભાઈ, વિપુલભાઈ, જયવીરસિંહ, વનરાજસિંહ અને દિવ્યરાજસિંહ સહિતના કર્મચારીઓ જોડાયા હતા. હાલ કોપરના જથ્થાના દસ્તાવેજો, GSTની ભરપાઈ અને માલ મંગાવવાની સમગ્ર પ્રક્રિયા અંગે તપાસ આગળ ધપાવવામાં આવી રહી છે.
