SMCની ટીમે ચુલી ગામની સીમમાં અમદાવાદ–કચ્છ હાઈવે પર કાર્યવાહી કરી; 17,304 બોટલ સાથે રૂ.90.48 લાખનો મુદ્દામાલ કબજે, ટ્રકચાલકની ધરપકડ
સુરેન્દ્રનગર જિલ્લાના ધ્રાંગધ્રા તાલુકામાં સ્ટેટ મોનિટરિંગ સેલ (SMC) દ્વારા વિદેશી દારૂની હેરાફેરી સામે મોટી કાર્યવાહી કરવામાં આવી છે. અમદાવાદ–કચ્છ નેશનલ હાઈવે પર ચુલી ગામની સીમમાં આશીર્વાદ હોટલ નજીકથી પસાર થઈ રહેલા આઇસર ટ્રકને રોકીને તપાસ કરતાં તેમાંથી અલગ-અલગ બ્રાન્ડની વિદેશી દારૂની કુલ 17,304 બોટલો મળી આવી હતી. કબજે કરાયેલા દારૂની કિંમત રૂ.75,41,676 હોવાનું જાણવા મળ્યું છે. પોલીસે ટ્રકચાલકની ધરપકડ કરી છે, જ્યારે હેરાફેરીમાં સંડોવાયેલા અન્ય આરોપીઓને ઝડપી પાડવા તપાસ શરૂ કરી છે.
ચોક્કસ બાતમીના આધારે ટ્રક રોકી તપાસ
મળતી માહિતી મુજબ, અમદાવાદથી કચ્છ તરફના હાઈવે પરથી વિદેશી દારૂનો મોટો જથ્થો ટ્રકમાં લઈ જવામાં આવી રહ્યો હોવાની બાતમી SMCને મળી હતી. તેના આધારે ટીમે ધ્રાંગધ્રા તાલુકાના ચુલી ગામની સીમમાં આશીર્વાદ હોટલ નજીક વોચ ગોઠવી હતી. આ દરમિયાન શંકાસ્પદ આઇસર ટ્રકને અટકાવી તેની તપાસ કરવામાં આવી હતી.
તપાસ દરમિયાન ટ્રકમાંથી અલગ-અલગ બ્રાન્ડની 17,304 બોટલો મળી આવતાં અધિકારીઓએ દારૂનો જથ્થો અને ટ્રક કબજે કર્યાં હતાં. આટલી મોટી માત્રામાં વિદેશી દારૂનો જથ્થો મળી આવતાં હેરાફેરીના નેટવર્ક અંગે તપાસ તેજ કરવામાં આવી છે.
ભાણવડના ટ્રકચાલકની ધરપકડ
પોલીસે ટ્રક નંબર GJ-25-UU-6805ના ચાલક અબ્બાસ હુસેનભાઈ સંધિની ધરપકડ કરી છે. પ્રાથમિક માહિતી મુજબ, તે દેવભૂમિ દ્વારકા જિલ્લાના ભાણવડ તાલુકાનો રહેવાસી છે. તેની પૂછપરછમાં દારૂનો જથ્થો ક્યાંથી લાવવામાં આવ્યો હતો, કોના કહેવાથી તેનું પરિવહન કરવામાં આવતું હતું અને કયા સ્થળે પહોંચાડવાનો હતો તે અંગે માહિતી મેળવવાના પ્રયાસો હાથ ધરવામાં આવ્યા છે.
ટ્રકમાલિક સહિત અન્ય આરોપીઓની શોધખોળ
આ કેસમાં ટ્રકમાલિક રાજુભાઈ ખીમાભાઈ સહિત અન્ય શખ્સોનાં નામ પણ સામે આવ્યાં છે. દારૂના જથ્થાને સુરક્ષિત રીતે આગળ પહોંચાડવા માટે અલ્ટો કાર દ્વારા પાયલોટિંગ કરવામાં આવતું હોવાની વિગતો પણ તપાસમાં સામે આવી છે. કારચાલક ટ્રકને રસ્તામાં રૂટ અને દિશા અંગે માર્ગદર્શન આપતો હોવાની આશંકા વ્યક્ત કરવામાં આવી છે.
આ ઉપરાંત દારૂનો જથ્થો મંગાવનાર, ટ્રકમાં માલ ભરાવનાર અને હેરાફેરીની સમગ્ર વ્યવસ્થામાં સંકળાયેલા અન્ય શખ્સોની ભૂમિકા પણ તપાસવામાં આવી રહી છે. હાલ ટ્રકમાલિક સહિતના અન્ય આરોપીઓની ધરપકડ બાકી હોવાનું જાણવા મળ્યું છે.
રૂ.90.48 લાખનો મુદ્દામાલ કબજે
SMC દ્વારા કરવામાં આવેલી કાર્યવાહીમાં વિદેશી દારૂની કિંમત રૂ.75,41,676, ટ્રકની કિંમત અંદાજે રૂ.15 લાખ, મોબાઇલની કિંમત રૂ.5,000 અને રોકડ રૂ.1,500 મળી કુલ રૂ.90,48,176નો મુદ્દામાલ કબજે કરવામાં આવ્યો હોવાનું જણાવાયું છે.
હેરાફેરીના નેટવર્ક સુધી પહોંચવા તપાસ
સુરેન્દ્રનગર જિલ્લામાંથી પસાર થતા નેશનલ હાઈવે પર દારૂની હેરાફેરીના બનાવો વચ્ચે SMCની આ કાર્યવાહીથી સમગ્ર નેટવર્ક અંગે સવાલો ઊભા થયા છે. આટલો મોટો જથ્થો ક્યાંથી આવ્યો હતો, તેની પાછળ કોણ કામ કરી રહ્યું હતું અને દારૂનો અંતિમ જથ્થો કોને પહોંચાડવાનો હતો તે તપાસનો મુખ્ય વિષય બન્યો છે.
હાલ ટ્રકચાલકની ધરપકડ બાદ અન્ય આરોપીઓને ઝડપી પાડવા અને હેરાફેરીના મુખ્ય સૂત્રધારો સુધી પહોંચવા તપાસ આગળ ધપાવવામાં આવી રહી છે. તપાસમાં અન્ય લોકોની સંડોવણી બહાર આવે તેવી શક્યતા છે.
