પાકિસ્તાને ચાર વિકેટે મેચ જીતતાં વડાપ્રધાને ટીમને અભિનંદન આપ્યા; યુઝર્સે કટાક્ષ કરતાં લખ્યું, ‘જાણે વર્લ્ડ કપ જીતી લીધો હોય’
હોંગકોંગ સિક્સ 2026 ક્રિકેટ ટૂર્નામેન્ટમાં ભારત સામે પાકિસ્તાનની જીત બાદ પાકિસ્તાનના વડાપ્રધાન શહબાઝ શરીફે ટીમને અભિનંદન પાઠવ્યા હતા. જોકે, તેમની ઉજવણીભરી પોસ્ટને કારણે સોશિયલ મીડિયા પર તેઓ ટ્રોલ થયા હતા. અનેક યુઝર્સે કટાક્ષભરી પ્રતિક્રિયાઓ આપતાં પાકિસ્તાનની આ જીતને લઈને વ્યંગ કર્યો હતો.
પાકિસ્તાને ભારતને ચાર વિકેટે હરાવ્યું હતું. આ જીત બાદ શહબાઝ શરીફે સોશિયલ મીડિયા પ્લેટફોર્મ X પર ખુશી વ્યક્ત કરી હતી અને ખેલાડીઓની પ્રશંસા કરી હતી. સાથે જ તેમણે પાકિસ્તાન ક્રિકેટ બોર્ડના અધ્યક્ષ મોહસિન નકવી અને તેમની ટીમનો પણ ખેલાડીઓને તૈયાર કરવા તથા સહયોગ આપવા બદલ આભાર માન્યો હતો.
વડાપ્રધાને ટીમને અભિનંદન આપ્યા
શહબાઝ શરીફે પોતાની પોસ્ટમાં લખ્યું હતું કે, હોંગકોંગ સિક્સ 2026માં ભારત સામેની મેચમાં ચાર વિકેટે શાનદાર જીત મેળવવા બદલ પાકિસ્તાની ટીમને અભિનંદન. તેમણે આ જીત માટે ખેલાડીઓની મહેનતની પ્રશંસા કરી હતી અને PCB અધ્યક્ષ મોહસિન નકવી સહિતના અધિકારીઓના યોગદાનનો પણ ઉલ્લેખ કર્યો હતો.
સોશિયલ મીડિયા પર યુઝર્સના કટાક્ષ
વડાપ્રધાનની પોસ્ટ સામે આવ્યા બાદ સોશિયલ મીડિયા પર યુઝર્સે વિવિધ પ્રતિક્રિયાઓ આપી હતી. કેટલાક યુઝર્સે વ્યંગ કરતાં લખ્યું હતું કે જાણે પાકિસ્તાને વર્લ્ડ કપ જીતી લીધો હોય તેવી ઉજવણી થઈ રહી છે. અન્ય એક યુઝરે તો કટાક્ષમાં આ જીતની ખુશીમાં રાષ્ટ્રીય રજા જાહેર કરવાની સલાહ પણ આપી હતી. આ રીતે મેચની જીત કરતાં વડાપ્રધાનની ઉજવણી સોશિયલ મીડિયા પર ચર્ચાનો વિષય બની હતી.
મેચમાં પાકિસ્તાનની આક્રમક બેટિંગ
હોંગકોંગના મોંગ કોક સ્થિત મિશન રોડ ગ્રાઉન્ડ ખાતે રમાયેલી ગ્રુપ-સીની મેચમાં ભારતે પ્રથમ બેટિંગ કરતાં છ ઓવરમાં પાંચ વિકેટે 88 રન બનાવ્યા હતા. ભારત તરફથી શશાંક સિંહે માત્ર 11 બોલમાં પાંચ છગ્ગાની મદદથી 40 રનની આક્રમક ઇનિંગ રમી હતી. નીતિશ રાણાએ 19 રનનું યોગદાન આપ્યું હતું.
જવાબમાં પાકિસ્તાને માત્ર 3.5 ઓવરમાં બે વિકેટ ગુમાવી 91 રન બનાવીને ચાર વિકેટે જીત મેળવી હતી. પાકિસ્તાન તરફથી અબ્બાસ આફ્રિદીએ માત્ર આઠ બોલમાં 35 રન ફટકાર્યા હતા. આ દરમિયાન તેમણે કૃણાલ પંડ્યાની એક ઓવરમાં સતત પાંચ છગ્ગા ફટકાર્યા હતા.
ખ્વાજા નફેએ પણ 12 બોલમાં અણનમ 41 રનની ધમાકેદાર ઇનિંગ રમી હતી. અબ્બાસ આફ્રિદી અને ખ્વાજા નફે વચ્ચે માત્ર 13 બોલમાં 59 રનની ભાગીદારી થઈ હતી. આ આક્રમક બેટિંગના આધારે પાકિસ્તાને ભારત સામે સરળતાથી લક્ષ્યાંક હાંસલ કર્યો હતો.
