Binanceના પ્રાથમિક અંદાજ મુજબ સુરક્ષા ઘટનાની અસર 6.3 અબજ ડોલર સુધી; આશરે 3 અબજ ડોલરના ફંડ ફ્રીઝ, યુઝર્સના તમામ નુકસાનની ભરપાઈ કરવાની કંપનીની ખાતરી
વિશ્વના સૌથી મોટા ક્રિપ્ટોકરન્સી એક્સચેન્જ Binance પર થયેલી મોટી સુરક્ષા ઘટનાએ વૈશ્વિક ક્રિપ્ટો માર્કેટમાં હલચલ મચાવી દીધી છે. બ્લોકચેન એનાલિટિક્સ કંપની Chainalysisના સંશોધકોએ અત્યાર સુધીમાં આશરે 5.912 અબજ ડોલરની ક્રિપ્ટોકરન્સી ચોરાઈ હોવાની પુષ્ટિ કરી છે. બીજી તરફ, Binanceએ પોતાની પ્રાથમિક તપાસના આધારે આ ઘટનાની કુલ અસર આશરે 6.3 અબજ ડોલર હોવાનો અંદાજ આપ્યો છે. જોકે, કંપનીએ સ્પષ્ટ કર્યું છે કે યુઝર્સના નાણાં સુરક્ષિત છે અને તમામ નુકસાનની ભરપાઈ SAFU ફંડ તથા કંપનીના પોતાના ભંડોળમાંથી કરવામાં આવશે.
કર્મચારીના લેપટોપ મારફતે હુમલો થયાની આશંકા
Binanceની પ્રાથમિક તપાસમાં સામે આવ્યું છે કે કંપનીના એક DevOps એન્જિનિયરના લેપટોપ સાથે ચેડાં કરીને હેકરે સિસ્ટમમાં પ્રવેશ મેળવ્યો હોવાની શક્યતા છે. ત્યારબાદ સર્વિસ કન્ટેનર સુધી પહોંચીને અનધિકૃત ઉપાડના વ્યવહારો કરવામાં આવ્યા હોવાનું કંપનીએ જણાવ્યું છે. જોકે, અત્યાર સુધીમાં વોલેટની પ્રાઇવેટ કી લીક થઈ હોવાના કોઈ પુરાવા મળ્યા નથી.
Binanceએ સુરક્ષા તપાસ પૂર્ણ ન થાય ત્યાં સુધી સાવચેતીના પગલાંરૂપે ડિપોઝિટ અને ઉપાડની સુવિધા અસ્થાયી રીતે બંધ કરી દીધી છે. અસરગ્રસ્ત એડ્રેસની મંજૂરી પણ રદ કરવામાં આવી છે. કંપની કાયદા અમલીકરણ એજન્સીઓ અને બ્લોકચેન નિષ્ણાતો સાથે મળીને ચોરાયેલા ફંડને ટ્રેક કરવા અને પાછા મેળવવાની કામગીરી કરી રહી છે.
આશરે 3 અબજ ડોલરના ફંડ ફ્રીઝ
Binanceના જણાવ્યા મુજબ, બ્લોકચેન ભાગીદારોની મદદથી અત્યાર સુધીમાં આશરે 3 અબજ ડોલરની અસરગ્રસ્ત ક્રિપ્ટોકરન્સી ફ્રીઝ કરવામાં આવી છે. Chainalysisના સંશોધકોના જણાવ્યા મુજબ, ચોરાયેલી રકમ અનેક બ્લોકચેન નેટવર્ક મારફતે ખસેડવામાં આવી રહી છે. તપાસ આગળ વધતાં વધુ ફંડ ફ્રીઝ થવાની શક્યતા છે.
કંપનીએ ખાતરી આપી છે કે આ ઘટનાને કારણે યુઝર્સને થનારા તમામ નુકસાનની ભરપાઈ કરવામાં આવશે. સુરક્ષા વ્યવસ્થા સામાન્ય થયા બાદ Binance તેની નવી Proof of Reserves રિપોર્ટ પણ જાહેર કરશે.
બિટકોઈનમાં મોટો ઘટાડો, અન્ય ક્રિપ્ટોકરન્સી પર પણ અસર
Binanceની સુરક્ષા ઘટનાના અહેવાલો સામે આવ્યા બાદ ક્રિપ્ટો માર્કેટમાં વેચવાલી વધી હતી. બિટકોઈનના ભાવમાં ઘટાડો નોંધાયો હતો અને તે 79,000 ડોલરના સ્તરથી નીચે સરક્યો હતો. કેટલાક અહેવાલો મુજબ, ભાવ ઘટીને 77,000 ડોલરની આસપાસ પણ પહોંચ્યો હતો. Ethereum અને Binanceના પોતાના ટોકન BNB સહિત અન્ય ક્રિપ્ટોકરન્સીમાં પણ ઘટાડો જોવા મળ્યો હતો.
વિશ્લેષકોના મતે, Binance વૈશ્વિક ક્રિપ્ટો માર્કેટનું મોટું એક્સચેન્જ હોવાથી તેની સુરક્ષા અંગે ઊભી થયેલી ચિંતા રોકાણકારોના વિશ્વાસ અને બજારના સેન્ટિમેન્ટને અસર કરી રહી છે.
ચાંગપેંગ ઝાઓએ પણ હેકિંગની આશંકા વ્યક્ત કરી
Binanceના સહ-સ્થાપક અને ભૂતપૂર્વ CEO ચાંગપેંગ ઝાઓએ પણ આ ઘટનાને સંભવિત હેકિંગ ગણાવી છે. જોકે, તેમણે સ્પષ્ટ કર્યું છે કે તેઓ હવે કંપનીનું દૈનિક સંચાલન કરતા નથી. શેરહોલ્ડર તરીકે તેમણે યુઝર્સના નાણાંની સંપૂર્ણ ભરપાઈ થવાની અપેક્ષા વ્યક્ત કરી છે.
Binanceએ યુઝર્સને પણ સાવચેત રહેવા અપીલ કરી છે. કંપનીએ ફેક મેસેજ, અજાણી લિંક્સ અને એકાઉન્ટની અંગત માહિતી માંગતી શંકાસ્પદ વિનંતીઓથી દૂર રહેવા જણાવ્યું છે. કંપનીના જણાવ્યા મુજબ, સુરક્ષા સંબંધિત તમામ નવી માહિતી માત્ર સત્તાવાર માધ્યમો દ્વારા જ જાહેર કરવામાં આવશે.
2025માં Bybit પર પણ થયો હતો મોટો હુમલો
ક્રિપ્ટો એક્સચેન્જો પર સાયબર હુમલાની ઘટનાઓ અગાઉ પણ સામે આવી ચૂકી છે. વર્ષ 2025માં Bybit એક્સચેન્જ પર થયેલા હુમલામાં આશરે 1.5 અબજ ડોલરની ક્રિપ્ટોકરન્સી ચોરાઈ હતી. આ ઘટનામાં ઉત્તર કોરિયા સાથે સંકળાયેલા હેકિંગ જૂથ પર શંકા વ્યક્ત કરવામાં આવી હતી.
જો Binanceની હાલની ઘટનામાં દર્શાવાયેલા આંકડાની અંતિમ પુષ્ટિ થાય, તો તે ક્રિપ્ટોકરન્સી ક્ષેત્રના સૌથી મોટા સાયબર હુમલાઓમાં સ્થાન મેળવી શકે છે. હાલ તપાસ ચાલુ હોવાથી ચોરીની ચોક્કસ વિગતો, જવાબદાર હેકર્સ અને ફંડની પુનઃપ્રાપ્તિ અંગે અંતિમ નિષ્કર્ષની રાહ જોવાઈ રહી છે.
