ઉત્તરાખંડના દેહરાદૂનમાં દિલ્હી-દેહરાદૂન એક્સપ્રેસવે નજીક એક વિચિત્ર અકસ્માતની ઘટના સામે આવી છે. રસ્તાની બાજુમાં દીવાલ પર બનાવવામાં આવેલા 3D પેઇન્ટિંગને ટ્રકચાલકે વાસ્તવિક રસ્તો સમજી લેતાં પૂરપાટ ઝડપે ટ્રક સીધી દીવાલ સાથે અથડાવી દીધી હતી. પેઇન્ટિંગમાં રસ્તો અને લેન એવી વાસ્તવિક રીતે દર્શાવવામાં આવ્યાં હતાં કે ચાલકને સામે સાચો રસ્તો હોવાનો ભ્રમ થયો હતો.
આ જોરદાર ટક્કરમાં કન્ટેનર ટ્રકનો આગળનો ભાગ ભારે નુકસાનગ્રસ્ત થયો હતો. જોકે, સદનસીબે આ અકસ્માતમાં ટ્રકચાલકનો આબાદ બચાવ થયો હતો. ઘટનાએ હાઇવે પર બનાવવામાં આવતાં અતિ-વાસ્તવિક ચિત્રો અને તેમની સુરક્ષાને લઈને સવાલો ઊભા કર્યા છે.
હાઇવેનું સૌંદર્ય વધારવા માટે બનાવવામાં આવતાં 3D પેઇન્ટિંગ્સ જો વાહનચાલકોને વાસ્તવિક રસ્તાનો ભ્રમ કરાવે, તો ગંભીર અકસ્માત સર્જાઈ શકે છે. આ ઘટનાએ હાઇવે પર યોગ્ય સંકેતચિહ્નો, બેરિકેડ્સ અને રોડ-સેફ્ટીના નિયમોનું પાલન કેટલું જરૂરી છે તે ફરી એકવાર સ્પષ્ટ કર્યું છે.
