રાજસ્થાનમાં કોટા નજીક દિલ્હી-મુંબઈ એક્સપ્રેસ હાઈવે પર ભયાનક માર્ગ અકસ્માત સર્જાયો છે. કરાડિયા નજીક યાત્રીઓથી ભરેલી એક મીની બસ અચાનક અનિયંત્રિત બની 15 ફૂટ ઊંડા નાળામાં ખાબકતાં 8 લોકોનાં મોત થયાં હતાં, જ્યારે અનેક મુસાફરો ઘાયલ થયા હતા. અકસ્માતને પગલે ઘટનાસ્થળે ચીસાચીસ અને અફરાતફરીનો માહોલ સર્જાયો હતો. ઘટનાની જાણ થતાં જ રાહત અને બચાવ ટીમો તાત્કાલિક સ્થળ પર પહોંચી ગઈ હતી અને બચાવ કામગીરી હાથ ધરવામાં આવી હતી.
પ્રાપ્ત વિગતો અનુસાર, મીની બસમાં કુલ 25 યાત્રીઓ સવાર હતા. આ તમામ યાત્રીઓ મધ્યપ્રદેશના બેતુલ જિલ્લાના રહેવાસી હોવાનું જાણવા મળ્યું છે. તેઓ ખાટુ શ્યામજીનાં દર્શન કરવા માટે શુક્રવારે ઘરેથી નીકળ્યા હતા. જોકે, મુસાફરી દરમિયાન કોટા નજીક કરાડિયા પાસે બસના ચાલકે કાબૂ ગુમાવતાં બસ સીધી નાળામાં ખાબકી હતી. બસ ઊંડા નાળામાં પડતાં મુસાફરોને ગંભીર ઇજાઓ પહોંચી હતી અને ઘટનાસ્થળે ભયાનક દૃશ્યો સર્જાયાં હતાં.
અકસમાતની જાણ થતાં જ સ્થાનિક તંત્ર અને બચાવદળની ટીમો ઘટનાસ્થળે પહોંચી હતી. નાળામાંથી મુસાફરોને બહાર કાઢવા માટે તાત્કાલિક રેસ્ક્યૂ ઓપરેશન શરૂ કરવામાં આવ્યું હતું. જોકે, નાળામાં પાણી અને કીચડ ભરાયેલાં હોવાથી બચાવ કામગીરીમાં મુશ્કેલીઓનો સામનો કરવો પડ્યો હતો. બચાવકર્મીઓએ ભારે જહેમત ઉઠાવીને ઘાયલોને બહાર કાઢવાની કામગીરી હાથ ધરી હતી.
આ દુર્ઘટનામાં 8 યાત્રીઓનાં મોત થયાં હતાં, જ્યારે અન્ય ઘાયલોને સારવાર માટે નજીકની હોસ્પિટલમાં ખસેડવામાં આવ્યા હતા. અકસ્માતના સમાચારથી મૃતકોના પરિવારોમાં શોકની લાગણી ફેલાઈ હતી. ધાર્મિક દર્શન માટે નીકળેલા યાત્રીઓની મુસાફરી અચાનક દુર્ઘટનામાં ફેરવાઈ જતાં સમગ્ર વિસ્તારમાં દુઃખનો માહોલ છવાયો હતો.
દિલ્હી-મુંબઈ એક્સપ્રેસ હાઈવે પર બનેલી આ દુર્ઘટનાએ માર્ગ સુરક્ષાને લઈને ફરી ચિંતા ઊભી કરી છે. જોકે, બસ કયા કારણોસર અનિયંત્રિત બની અને અકસ્માત કેવી રીતે સર્જાયો તે અંગેની સત્તાવાર વિગતો તપાસ બાદ સ્પષ્ટ થશે. હાલ ઘાયલોને તબીબી સારવાર આપવામાં આવી રહી છે અને અકસ્માતને પગલે બચાવ તથા રાહત કામગીરી હાથ ધરવામાં આવી હતી.
