ફ્લાય દુબઈની 30 સપ્ટેમ્બરની ફ્લાઇટ સાથે જોડાયેલા કથિત અપહરણ અને વિમાનને ક્રેશ કરાવવાના ષડયંત્રની તપાસમાં યુએઈ પોલીસે માલદીવના બે પાયલોટની ધરપકડ કરી હોવાના અહેવાલ સામે આવ્યા છે. આ ઘટનામાં કાવતરું નિષ્ફળ બનાવવાના પ્રયાસ દરમિયાન ભારતીય કેપ્ટન સ્મિત મચ્છર ઘાયલ થયા હોવાનું પણ અહેવાલમાં જણાવાયું છે.
માલદીવના સમાચાર પોર્ટલ ‘અધાધુ’ના અહેવાલ મુજબ, બંને સહ-પાયલોટને 3 ઓક્ટોબરે કસ્ટડીમાં લેવામાં આવ્યા હતા. માલદીવના દૂતાવાસે તેમના પરિવારજનોને આ અંગે સત્તાવાર જાણ કરી હોવાનું કહેવાય છે.
માલદીવના અખબાર ‘મિહારુ’ના અહેવાલ અનુસાર, બંને પાયલોટનો કથિત હુમલાખોર પાયલોટ અલ હમામી સાથે કાર્યસ્થળ પર સંપર્ક હતો અને તેઓ તેની સાથે એક જ ઇમારતમાં રહેતા હોવાની માહિતી સામે આવી છે.
જોકે, યુએઈના અધિકારીઓએ બંનેની ધરપકડ અંગેના આરોપો, તપાસની પ્રગતિ કે તેમની કથિત ભૂમિકા વિશે સત્તાવાર વિગતો જાહેર કરી નથી. ફ્લાય દુબઈમાં કાર્યરત માલદીવના છ પાયલોટમાં આ બંનેનો સમાવેશ થતો હોવાનું અહેવાલમાં જણાવાયું છે. સમગ્ર મામલે તપાસ ચાલુ હોવાનું કહેવાય છે.
