હોર્મુઝ સ્ટ્રેટમાં અમેરિકાની કડક નાકાબંધી વચ્ચે 86 જહાજોના માર્ગ બદલાયા, 3 જહાજ નિષ્ક્રિય
નવી દિલ્હી: પશ્ચિમ એશિયામાં ચાલી રહેલો સંઘર્ષ વધુ ગંભીર બની રહ્યો છે. એક તરફ હોર્મુઝ સ્ટ્રેટમાં અમેરિકન સેનાએ ઈરાન સામે કાર્યવાહી વધુ કડક બનાવી છે, તો બીજી તરફ યમનમાં ઈરાન સમર્થિત હૂતી બળવાખોરોએ 10 બેલિસ્ટિક મિસાઇલો લોન્ચ કરીને તણાવ વધારી દીધો છે. હોર્મુઝથી લઈને યમન સુધી વધતી સૈન્ય કાર્યવાહીથી સમગ્ર વિસ્તારમાં યુદ્ધનો ખતરો વધુ ઘેરો બન્યો છે.
હોર્મુઝમાં 86 જહાજોના માર્ગ બદલાયા
અમેરિકન સેન્ટ્રલ કમાન્ડના જણાવ્યા મુજબ, અમેરિકન નેવી હોર્મુઝ સ્ટ્રેટમાં ઈરાન સામેની નાકાબંધીને કડક રીતે અમલમાં મૂકી રહી છે.
2 સપ્ટેમ્બર સુધીમાં 86 કોમર્શિયલ જહાજોના માર્ગ બદલવામાં આવ્યા છે. આ ઉપરાંત 3 જહાજોને નિષ્ક્રિય કરવામાં આવ્યા હોવાનું અને 2 જહાજો પર સવાર થઈને તપાસ કરવામાં આવી હોવાનું જણાવાયું છે.
હોર્મુઝ સ્ટ્રેટ વિશ્વના મહત્વપૂર્ણ ઊર્જા માર્ગોમાંનું એક હોવાથી અહીંની સૈન્ય કાર્યવાહીથી વૈશ્વિક સ્તરે પણ ચિંતા વધી છે.
યમનમાં હૂતી બળવાખોરોનો મિસાઈલ હુમલો
અમેરિકાની કાર્યવાહી વચ્ચે યમનમાં ઈરાન સમર્થિત હૂતી બળવાખોરોએ 10 બેલિસ્ટિક મિસાઇલો છોડતાં તણાવ વધુ વધી ગયો છે.
યમનની સરકારી સેનાના જણાવ્યા મુજબ, મિસાઇલો પશ્ચિમ યમનના વિસ્તારોને નિશાન બનાવીને છોડવામાં આવી હતી. ખાસ કરીને તાઈઝ પ્રાંતના મોખા શહેર અને હોદેઈદાહ પ્રાંતના અલ-ખોખા વિસ્તારને નિશાન બનાવવામાં આવ્યા હતા.
સ્થાનિક સૂત્રોના જણાવ્યા મુજબ મોટાભાગની મિસાઇલો મોખા શહેર તરફ છોડવામાં આવી હતી. અહીં છેલ્લા કેટલાક અઠવાડિયાથી હૂતી બળવાખોરો દ્વારા ડ્રોન હુમલાઓ પણ કરવામાં આવી રહ્યા છે.
જમીની લડાઈ પણ ઉગ્ર બની
મિસાઈલ હુમલાની સાથે યમનમાં હૂતી બળવાખોરો અને સરકારી દળો વચ્ચેની જમીની લડાઈ પણ વધુ હિંસક બની છે. તાઈઝના અલ-કદહા-અલ-બરાહ વિસ્તારમાં હૂતી લડવૈયાઓએ જમીની હુમલો કર્યો હતો. જોકે સરકારી દળોએ વળતો પ્રહાર કરીને તેમને પાછળ હટાવ્યા હોવાનો દાવો કરવામાં આવ્યો છે.
હોર્મુઝથી યમન સુધી તણાવ ચરમસીમાએ
હોર્મુઝ સ્ટ્રેટમાં અમેરિકન નેવીની કડક કાર્યવાહી અને યમનમાં હૂતી બળવાખોરોના વધતા મિસાઈલ તથા જમીની હુમલાઓએ પશ્ચિમ એશિયાની સ્થિતિને વધુ સંવેદનશીલ બનાવી છે.
એક તરફ હોર્મુઝમાં જહાજોની અવરજવર પર અમેરિકાની નજર છે, તો બીજી તરફ યમનમાં મિસાઈલ હુમલાઓ વધી રહ્યા છે. બંને મોરચે વધતા તણાવને કારણે સંઘર્ષ વધુ વિસ્તરે તેવી આશંકા વચ્ચે આંતરરાષ્ટ્રીય સમુદાયની ચિંતા પણ વધી રહી છે.
