વોશિંગ્ટન: અમેરિકાના રાષ્ટ્રપતિ ડોનાલ્ડ ટ્રમ્પે હોર્મુઝ સામુદ્રધુનીનું નામ બદલીને ‘ટ્રમ્પ સ્ટ્રેટ’ રાખવાની વાત કરી છે. ટ્રમ્પે સોશિયલ મીડિયા પોસ્ટમાં દાવો કર્યો કે હવે આ મહત્વપૂર્ણ જળમાર્ગ અમેરિકાના નિયંત્રણ હેઠળ છે, તેથી તેનું નામ બદલવું જોઈએ.
ટ્રમ્પે લખ્યું કે, “હવે જ્યારે તે અમેરિકાના નિયંત્રણમાં છે, તો શું હોર્મુઝ સ્ટ્રેટનું નામ બદલીને ટ્રમ્પ સ્ટ્રેટ કરવું જોઈએ?” તેમણે આગળ મજાકિયા અંદાજમાં કહ્યું કે અમેરિકાની જેમ આ નામ પણ ‘હોટર’ હશે.
હોર્મુઝ સામુદ્રધુની વિશ્વના સૌથી વ્યૂહાત્મક જળમાર્ગોમાંનું એક છે. તે પર્શિયન ગલ્ફને ઓમાનની ખાડી સાથે જોડે છે અને વૈશ્વિક તેલ તથા ગેસના પરિવહન માટે અત્યંત મહત્વપૂર્ણ છે.
ટ્રમ્પનું આ નિવેદન એવા સમયે આવ્યું છે જ્યારે અમેરિકા અને ઈરાન વચ્ચે હોર્મુઝને લઈને તણાવ ચરમસીમાએ છે. ઈરાન આ જળમાર્ગ પર પોતાનું નિયંત્રણ હોવાનો દાવો કરે છે, જ્યારે ટ્રમ્પ અમેરિકાના નિયંત્રણનો દાવો કરી રહ્યા છે.
ટ્રમ્પના ‘ટ્રમ્પ સ્ટ્રેટ’ નામ બદલવાના સૂચનથી આંતરરાષ્ટ્રીય સ્તરે ફરી એકવાર ચર્ચા અને વિવાદ સર્જાયો છે.
