નવી દિલ્હી: અમેરિકા અને ઈરાન વચ્ચે ફરી તણાવ વધતાં આંતરરાષ્ટ્રીય બજારમાં ક્રૂડ ઓઇલના ભાવમાં તેજી જોવા મળી રહી છે. હાલ બ્રેન્ટ ક્રૂડ આશરે 95 ડોલરની આસપાસ છે અને જો ભાવ 100 ડોલરની સપાટી પાર કરીને લાંબા સમય સુધી ટકશે તો ભારતની ઓઇલ માર્કેટિંગ કંપનીઓ પર પેટ્રોલ-ડીઝલના ભાવ વધારવાનું દબાણ વધી શકે છે.
ઓઇલ માર્કેટિંગ કંપનીઓ હાલમાં મર્યાદિત માર્જિન સાથે પેટ્રોલ-ડીઝલનું વેચાણ કરી રહી છે. ક્રૂડનો ભાવ 85થી 90 ડોલરની આસપાસ રહે તો કંપનીઓ વધેલા ખર્ચને અમુક હદ સુધી શોષી શકે છે, પરંતુ 90 ડોલરથી ઉપરનો ભાવ લાંબા સમય સુધી રહે તો અન્ડર-રિકવરીનું દબાણ વધી શકે છે.
100 ડોલર પાર થતાં ચિંતા વધશે
આંતરરાષ્ટ્રીય ક્રૂડના ભાવમાં વધારા સાથે ભારત માટે આયાત ખર્ચ પણ વધી શકે છે. ખાસ કરીને ભારત પોતાની જરૂરિયાતના મોટા હિસ્સા માટે આયાતી ક્રૂડ પર નિર્ભર હોવાથી વૈશ્વિક ભાવની સીધી અસર દેશના ઇંધણ બજાર પર પડે છે.
હાલ ઓઇલ કંપનીઓની નજર માત્ર ભાવ કેટલો વધે છે તેના પર નહીં, પરંતુ 90 ડોલરથી ઉપરનો ભાવ કેટલા સમય સુધી ટકે છે તેના પર પણ છે. જો ભાવ લાંબા સમય સુધી ઊંચા રહે તો પેટ્રોલ-ડીઝલના ભાવ અંગે ફરી નિર્ણય લેવાની સ્થિતિ ઊભી થઈ શકે છે.
મે મહિનામાં પણ થયો હતો ભાવ વધારો
આંતરરાષ્ટ્રીય ક્રૂડના ભાવમાં ઉછાળા વચ્ચે મે મહિનામાં ભારતમાં પેટ્રોલ-ડીઝલના ભાવમાં વધારો કરવામાં આવ્યો હતો. 15 મેના રોજ પેટ્રોલ અને ડીઝલમાં આશરે રૂ.3 પ્રતિ લીટરનો વધારો થયો હતો અને ત્યારબાદ પણ ભાવમાં તબક્કાવાર વધારો કરવામાં આવ્યો હતો.
હવે ફરી ક્રૂડ ઓઇલ ઊંચા ભાવે પહોંચતાં ગ્રાહકો પર વધુ બોજ પડવાની ચિંતા છે.
શિપિંગ અને વોર-રિસ્ક પણ પડકાર
મધ્યપૂર્વમાં ચાલી રહેલા તણાવને કારણે ક્રૂડની સપ્લાય અને શિપિંગ વ્યવસ્થા પર પણ જોખમ ઊભું થયું છે. વોર-રિસ્ક પ્રીમિયમ અને પરિવહન ખર્ચમાં વધારો થાય તો ભારત માટે આયાતી ક્રૂડ વધુ મોંઘું પડી શકે છે.
જો ક્રૂડ ઓઇલ 100 ડોલરની સપાટી પાર કરીને લાંબા સમય સુધી ઊંચા ભાવે રહે છે, તો પેટ્રોલ-ડીઝલના ભાવમાં ફરી વધારો થવાની શક્યતા નકારી શકાય નહીં. હાલમાં ઓઇલ કંપનીઓ અને સરકાર વૈશ્વિક બજારની સ્થિતિ પર સતત નજર રાખી રહ્યાં છે.
