ભાજપની રાષ્ટ્રીય ટીમમાં ફેરફાર બાદ હવે આગામી ઉત્તર પ્રદેશ વિધાનસભા ચૂંટણી માટે પાર્ટીએ સંગઠનને વધુ મજબૂત બનાવવાની કવાયત શરૂ કરી છે. ચર્ચા છે કે ગુજરાતમાં લાંબા સમયથી સફળ રહેલા સંગઠન અને બૂથ મેનેજમેન્ટના મોડેલને ઉત્તર પ્રદેશમાં અજમાવવામાં આવશે.
ઉત્તર પ્રદેશના પ્રભારી તરીકે વિનોદ તાવડે અને સહપ્રભારી તરીકે ગુજરાતના જગદીશ પટેલને જવાબદારી સોંપવામાં આવી છે. જગદીશ પટેલ અગાઉ 2024ની વારાણસી લોકસભા ચૂંટણીમાં સંગઠનાત્મક કામગીરી સાથે જોડાયેલા હતા. 2022ની ઉત્તર પ્રદેશ ચૂંટણી દરમિયાન પણ ગુજરાતમાંથી મોટી સંખ્યામાં કાર્યકર્તાઓને માઇક્રો મેનેજમેન્ટ માટે મોકલવામાં આવ્યા હતા.
ગુજરાતમાં ભાજપે પેજ સમિતિ, બૂથ મેનેજમેન્ટ અને સતત સંગઠનાત્મક કામગીરી દ્વારા પોતાનો મજબૂત ગઢ જાળવી રાખ્યો છે. હવે આ જ પદ્ધતિને ઉત્તર પ્રદેશ જેવા મોટા રાજ્યમાં વધુ વ્યાપક રીતે અમલમાં મૂકવાની તૈયારી હોવાનું માનવામાં આવે છે.
2024ની લોકસભા ચૂંટણીમાં ઉત્તર પ્રદેશની 80 બેઠકોમાંથી ભાજપને 33 બેઠકો મળી હતી. સમાજવાદી પાર્ટીએ 37 અને કોંગ્રેસે 6 બેઠકો જીતી હતી. આ પરિણામ બાદ ભાજપે ગ્રાઉન્ડ લેવલના સંગઠનને વધુ સક્રિય કરવાની જરૂરિયાત અનુભવી હોવાનું માનવામાં આવે છે.
સ્મૃતિ ઈરાનીની ફરી ઉત્તર પ્રદેશમાં એન્ટ્રી
ભાજપની નવી ટીમમાં સ્મૃતિ ઈરાનીને ફરી મહત્વની જવાબદારી મળતાં ઉત્તર પ્રદેશમાં તેમની ભૂમિકા અંગે ચર્ચા શરૂ થઈ છે. 2019માં અમેઠીમાં રાહુલ ગાંધીને હરાવીને તેમણે રાષ્ટ્રીય રાજકારણમાં ‘જાયન્ટ કિલર’ તરીકે ઓળખ મેળવી હતી. જોકે 2024માં અમેઠીમાં તેમને હારનો સામનો કરવો પડ્યો હતો.
હવે પાર્ટી તેમને ફરી ઉત્તર પ્રદેશમાં સક્રિય કરીને ખાસ કરીને મહિલા મતદારો સુધી પહોંચ વધારવા માટે ઉપયોગ કરવાની દિશામાં આગળ વધી રહી હોવાનું માનવામાં આવે છે.
અમિત માલવીય બાદ સોશિયલ મીડિયા વ્યૂહરચનામાં ફેરફાર
ભાજપના આઈટી સેલમાં પણ મહત્વનો ફેરફાર થયો છે. 11 વર્ષ સુધી સોશિયલ મીડિયા અને આઈટી સેલની કામગીરી સંભાળનાર અમિત માલવીયાને નવી ટીમમાં સ્થાન ન મળતાં હવે સોશિયલ મીડિયા માટે નવી વ્યૂહરચના તૈયાર થઈ રહી છે.
તેમના સ્થાને છત્તીસગઢના દીપક મહાસ્કેને જવાબદારી સોંપાઈ હોવાનું જણાવાયું છે. પાર્ટી હવે Instagram સહિતના પ્લેટફોર્મ પર ખાસ ધ્યાન કેન્દ્રિત કરીને Gen-Z અને યુવા મતદારો સુધી પહોંચવા માટે ઇન્ફ્લુએન્સર્સ અને સોશિયલ મીડિયા કાર્યકર્તાઓની મોટી ટીમ તૈયાર કરવાની દિશામાં કામ કરી રહી હોવાનું કહેવાય છે.
કેન્દ્રના મંત્રીમંડળમાં પણ ફેરફારની અટકળો
ભાજપની સંગઠનાત્મક ટીમમાં ફેરફાર બાદ હવે મોદી સરકારના મંત્રીમંડળમાં પણ પુનર્ગઠનની ચર્ચા ચાલી રહી છે. ટોચના કેટલાક મંત્રીઓને યથાવત રાખીને લગભગ 29 મંત્રીઓના ખાતામાં ફેરફાર થઈ શકે તેવી અટકળો છે.
પિયુષ ગોયલને તેમના વર્તમાન મંત્રાલય સાથે યથાવત રાખવાની શક્યતા અંગે ચર્ચા છે. બીજી તરફ પ્રહલાદ પટેલને શિક્ષણ મંત્રાલયની કાયમી જવાબદારી અપાશે કે નવા યુવા ચહેરાને તક મળશે તે અંગે નિર્ણય પર નજર છે.
હરદીપસિંહ પુરીના રાજ્યસભા કાર્યકાળની નિવૃત્તિ બાદ સરકારમાં નવા શીખ ચહેરાને સ્થાન આપવાની શક્યતા પણ ચર્ચાઈ રહી છે. ઉત્તર પ્રદેશની ચૂંટણીને ધ્યાનમાં રાખીને પ્રાદેશિક અને સામાજિક સમીકરણોને ધ્યાનમાં રાખી નવા ચહેરાઓને મંત્રીમંડળમાં તક મળી શકે છે.
ભાજપની સમગ્ર કવાયત પરથી સંકેત મળી રહ્યો છે કે પાર્ટી હવે માત્ર મોટા નેતાઓના પ્રચાર પર નહીં, પરંતુ બૂથ મેનેજમેન્ટ, માઇક્રો મેનેજમેન્ટ અને સોશિયલ મીડિયા સુધીની સંપૂર્ણ ચૂંટણી મશીનરીને વધુ મજબૂત બનાવવા પર ભાર મૂકી રહી છે.
