આંતરરાષ્ટ્રીય બજારમાં ક્રૂડ ઓઈલના ભાવ ફરી 90 ડોલર પ્રતિ બેરલની ઉપર પહોંચી ગયા છે. 19 ઓગસ્ટે બ્રેન્ટ ક્રૂડ લગભગ 91.56 ડોલર પ્રતિ બેરલ સુધી પહોંચ્યું હતું. હોર્મુઝ જળમાર્ગને લઈને સતત અનિશ્ચિતતા અને સપ્લાયમાં વિક્ષેપના કારણે ઓઈલ માર્કેટમાં જોખમનું પ્રીમિયમ વધ્યું છે.
ભારતીય રિફાઈનરીઓ માટે મુશ્કેલી એ છે કે માત્ર વૈશ્વિક ક્રૂડના ભાવ જ નહીં, પરંતુ ગલ્ફ ક્રૂડના પ્રીમિયમ અને શિપિંગ ખર્ચમાં પણ વધારો થયો છે. બીજી તરફ રશિયન ક્રૂડ પર અગાઉ મળતા ડિસ્કાઉન્ટ પણ લગભગ ગાયબ થઈ ગયા છે. પરિણામે ભારતીય રિફાઈનરીઓનો વાસ્તવિક ક્રૂડ ખરીદી ખર્ચ વૈશ્વિક બેન્ચમાર્ક કરતાં વધુ ઝડપથી વધી રહ્યો છે.
હોર્મુઝ રૂટમાં અવરજવર ઘટતાં વૈકલ્પિક માર્ગોનો ઉપયોગ કરવો પડી રહ્યો છે, જેના કારણે પરિવહન અને વીમા ખર્ચ વધે છે. આ સ્થિતિ લાંબી ચાલે તો પેટ્રોલ, ડીઝલ અને અન્ય પેટ્રોલિયમ ઉત્પાદનોના ઉત્પાદન ખર્ચ પર દબાણ વધી શકે છે.
જુલાઈમાં ક્રૂડનો ભાવ આશરે 70 ડોલર પ્રતિ બેરલ સુધી ઘટ્યો હતો, પરંતુ ત્યારબાદ ભૌગોલિક-રાજકીય તણાવ ફરી વધતા ભાવમાં ઉછાળો આવ્યો છે. હાલના સંજોગોમાં ક્રૂડ ઓઈલમાં મોટી રાહત ન મળે ત્યાં સુધી ભારતમાં પેટ્રોલ-ડીઝલ સસ્તા થવાની શક્યતા પર અનિશ્ચિતતા યથાવત્ રહેવાની છે.
