રણબીર બનશે શ્રીરામ, યશ રાવણ અને સાઈ પલ્લવી માતા સીતા; દિવાળી-2026માં પ્રથમ ભાગ રિલીઝ થશે
મુંબઈ: નિર્માતા નમિત મલ્હોત્રા અને દિગ્દર્શક નિતેશ તિવારીના ડ્રીમ પ્રોજેક્ટ **’રામાયણ: ભાગ-1’**નું ટીઝર રિલીઝ થતાં જ ફિલ્મપ્રેમીઓમાં ભારે ઉત્સાહ જોવા મળી રહ્યો છે. અંદાજે રૂ.4,000 કરોડના બજેટ સાથે બની રહેલી આ ફિલ્મ ભારતીય સિનેમાના ઇતિહાસની સૌથી મોંઘી ફિલ્મોમાં સ્થાન પામશે.
બે ભાગમાં બની રહેલી ફિલ્મનો પ્રથમ ભાગ દિવાળી-2026 દરમિયાન અને બીજો ભાગ દિવાળી-2027માં રિલીઝ થશે. ફિલ્મનું નિર્માણ Prime Focus Studios અને યશની Monster Mind Creations દ્વારા કરવામાં આવી રહ્યું છે, જ્યારે વિઝ્યુઅલ ઇફેક્ટ્સની જવાબદારી ઓસ્કર વિજેતા DNEG સંભાળી રહી છે.
ફિલ્મમાં રણબીર કપૂર ભગવાન શ્રીરામ, યશ રાવણ, સાઈ પલ્લવી માતા સીતા, સની દેઓલ ભગવાન હનુમાન અને રવિ દુબે લક્ષ્મણની ભૂમિકામાં જોવા મળશે. જ્યારે વિવેક ઓબેરોય વિદ્યુતજિહ્વાનું પાત્ર ભજવશે.
ફિલ્મનું વધુ એક આકર્ષણ તેનું સંગીત છે. ઓસ્કર વિજેતા એ.આર. રહેમાન અને હોલિવૂડના દિગ્ગજ સંગીતકાર હેન્સ ઝિમર પ્રથમ વખત સાથે મળીને ફિલ્મનું સંગીત અને બેકગ્રાઉન્ડ સ્કોર તૈયાર કરી રહ્યા છે.
ફિલ્મના પ્રથમ ભાગનું શૂટિંગ પૂર્ણ થઈ ચૂક્યું છે અને હાલ તેનું પોસ્ટ-પ્રોડક્શનનું કામ ઝડપી ગતિએ ચાલી રહ્યું છે.
