શિક્ષણ, આરોગ્ય, જોબ પોર્ટલ અને લગ્ન સેતુ યોજનાઓને વધુ વ્યાપક બનાવાશે; 2027ના LIBF એક્ઝિબિશનની તૈયારીઓનો પ્રારંભ
ગીર સોમનાથ (સોમનાથ): શ્રી લોહાણા મહાપરિષદના વિશ્વયક પ્રમુખ સતિષભાઈ વિઠલાણીના માર્ગદર્શન હેઠળ સૌરાષ્ટ્ર ઝોન-3ના પ્રમુખ તરીકે પાર્થભાઈ કોટેચાની વરણી બાદ પ્રથમ સંયુક્ત બેઠક સોમનાથ ખાતે યોજાઈ હતી. સ્થાનિક મહાજનના યજમાનપદે યોજાયેલી બેઠકમાં સમાજના સંગઠનને વધુ મજબૂત બનાવવાની સાથે મહાપરિષદની સેવાઓ સમાજના છેવાડાના પરિવારો સુધી પહોંચાડવાનો સંકલ્પ વ્યક્ત કરવામાં આવ્યો હતો.
જૂનાગઢ અને ગીર સોમનાથ જિલ્લાના વિવિધ તાલુકાઓમાં હોદ્દેદારોની નિમણૂક બાદ યોજાયેલી આ પ્રથમ બેઠકમાં શિક્ષણ સહાય, આરોગ્ય સહાય, જોબ પોર્ટલ, લગ્ન સેતુ સહિતની વિવિધ યોજનાઓની વિસ્તૃત માહિતી આપવામાં આવી હતી. સાથે જ તમામ હોદ્દેદારોની માહિતી ધરાવતી ડિરેક્ટરીનું વિમોચન કરવામાં આવ્યું હતું અને ‘લોહાણા કનેક્ટ’ એપ સાથે વધુમાં વધુ સમાજજનોને જોડવા માટે વિશેષ અભિયાન ચલાવવાનો નિર્ણય લેવાયો હતો.
પ્રમુખ પાર્થભાઈ કોટેચાએ જણાવ્યું હતું કે સૌરાષ્ટ્ર ઝોન-3 હેઠળના તમામ તાલુકાના લોહાણા મહાજનોને એક મંચ પર લાવી સંગઠનને વધુ સશક્ત બનાવવાનો પ્રયાસ કરવામાં આવી રહ્યો છે. તેમણે મહાપરિષદના સ્થાપનાના 75 વર્ષ નિમિત્તે વર્ષ 2027માં મુંબઈના જિયો વર્લ્ડ કન્વેન્શન સેન્ટર ખાતે યોજાનારા **Lohana International Business Forum (LIBF)**ના ભવ્ય એક્ઝિબિશનની પણ માહિતી આપી હતી.
મહિલા વિંગના પ્રમુખ પૂજાબેન કારિયાએ મહિલાઓ અને ગૃહ ઉદ્યોગ સાથે જોડાયેલી બહેનોને LIBF દ્વારા પોતાના ઉત્પાદનોને વૈશ્વિક બજાર સુધી પહોંચાડવાની તકનો લાભ લેવા આહ્વાન કર્યું હતું.
બેઠકમાં સમાજના અગ્રણી આગેવાનો, મહાપરિષદના ઝોન-3ના હોદ્દેદારો, મહિલા વિંગના પ્રતિનિધિઓ તેમજ જૂનાગઢ અને ગીર સોમનાથ જિલ્લાના વિવિધ તાલુકાઓના મહાજન પ્રતિનિધિઓ મોટી સંખ્યામાં ઉપસ્થિત રહ્યા હતા.
