નીતિન નવીનની ટીમમાં Gen-Z ફેક્ટરને પ્રાધાન્ય મળવાની ચર્ચા; સોશિયલ મીડિયા વ્યૂહરચનામાં પણ બદલાવની તૈયારી
નવી દિલ્હી: તાજેતરના વિદ્યાર્થી આંદોલનો અને સોશિયલ મીડિયા પર જોવા મળેલી યુવાનોની સક્રિય ભાગીદારી બાદ ભાજપ પોતાના સંગઠનાત્મક માળખા અને રાજકીય વ્યૂહરચનાની સમીક્ષા કરી રહ્યું હોવાનું રાજકીય વર્તુળોમાં ચર્ચાઈ રહ્યું છે. ખાસ કરીને યુવા મતદારો સુધી વધુ અસરકારક રીતે પહોંચવા માટે પક્ષની નવી સંગઠન ટીમમાં Gen-Z પેઢીના પ્રતિનિધિત્વને વધુ સ્થાન મળે તેવી શક્યતા વ્યક્ત કરવામાં આવી રહી છે.
સૂત્રોના જણાવ્યા મુજબ ભાજપના રાષ્ટ્રીય અધ્યક્ષ નીતિન નવીનની નવી સંગઠન ટીમની જાહેરાત પહેલાં તેના માળખામાં ફરી વિચારણા શરૂ કરવામાં આવી છે. અગાઉ તૈયાર કરાયેલી રૂપરેખામાં યુવા ચહેરાઓ, સોશિયલ મીડિયા પર પ્રભાવશાળી નેતાઓ અને નવી પેઢી સાથે સંવાદ સ્થાપિત કરી શકે એવા કાર્યકરોને વધુ મહત્વ આપવાની દિશામાં ફેરફારો થઈ રહ્યા હોવાનું માનવામાં આવે છે.
પક્ષની અંદર એવી પણ ચર્ચા છે કે આગામી સમયમાં સંગઠનમાં યુવા નેતાઓને વધુ જવાબદારીઓ સોંપવામાં આવશે. સાથે જ મહિલા પ્રતિનિધિત્વ વધારવા અને નવા પ્રવક્તાઓને તક આપવા અંગે પણ વિચારણા ચાલી રહી છે.
તાજેતરના સમયમાં સોશિયલ મીડિયા રાજકારણનું મહત્વ વધતાં ભાજપ પોતાની ડિજિટલ વ્યૂહરચનાને પણ વધુ મજબૂત બનાવવા પર ભાર મૂકી રહ્યું છે. યુવા મતદારો સુધી સીધો સંપર્ક સ્થાપિત કરવા માટે વિવિધ સોશિયલ મીડિયા પ્લેટફોર્મનો વધુ અસરકારક ઉપયોગ કરવાની તૈયારી ચાલી રહી હોવાનું માનવામાં આવે છે.
જોકે, સંગઠનમાં સંભવિત ફેરફારો અંગે પક્ષ તરફથી હજુ સુધી કોઈ સત્તાવાર જાહેરાત કરવામાં આવી નથી. નવી ટીમની જાહેરાત બાદ જ સંગઠનના નવા માળખા અને તેમાં સામેલ ચહેરાઓ અંગે સ્પષ્ટ ચિત્ર સામે આવશે.
