સાતમા દિવસે ભારતે જીત્યા ત્રણ મેડલ; કુલ સંખ્યા 15 પર પહોંચી, બોક્સિંગમાં વધુ 6 મેડલ નિશ્ચિત
ગ્લાસગો: કોમનવેલ્થ ગેમ્સ 2026ના સાતમા દિવસે ભારતીય ખેલાડીઓએ ઉત્કૃષ્ટ પ્રદર્શન કરીને દેશના ખાતામાં એક ગોલ્ડ અને બે સિલ્વર સહિત ત્રણ નવા મેડલ ઉમેર્યા છે. આ સાથે ભારતનો કુલ મેડલ આંક 15 (3 ગોલ્ડ, 9 સિલ્વર અને 3 બ્રોન્ઝ) પર પહોંચ્યો છે.
ભારત માટે દિવસની સૌથી મોટી સિદ્ધિ પુરુષોની 100 મીટર T47 પેરા સ્પર્ધામાં મળી હતી. દિલિપ મહાદુ ગાવિતે 10.71 સેકન્ડના સમય સાથે ગોલ્ડ મેડલ જીત્યો, જ્યારે મોહમ્મદ બેસિલ મોર્સિંગનાકાથ 10.83 સેકન્ડમાં રેસ પૂર્ણ કરીને સિલ્વર મેડલના હકદાર બન્યા. આ સ્પર્ધામાં ભારતે ગોલ્ડ અને સિલ્વર બંને મેડલ પોતાના નામે કર્યા.
એથ્લેટિક્સમાં ભારતને ત્રીજો મેડલ મુરલી શ્રીશંકરે અપાવ્યો. પુરુષોની લોંગ જમ્પમાં તેમણે 8.09 મીટરનો શ્રેષ્ઠ જમ્પ લગાવી સિલ્વર મેડલ જીત્યો. જમૈકાના ટેજે ગેલે 8.15 મીટરના જમ્પ સાથે ગોલ્ડ મેડલ મેળવ્યો.
બોક્સિંગમાં પણ ભારત માટે દિવસ યાદગાર રહ્યો. અંકુશ યાદવ, સાક્ષી ચૌધરી, અરુંધતી ચૌધરી, સચિન સિવાચ, નરેન્દ્ર બેરવાલ અને જેસ્મિન લેમ્બોરિયા સેમિફાઇનલમાં પહોંચતા ભારતના વધુ છ મેડલ નિશ્ચિત થયા છે.
શોટપુટમાં મનપ્રીત કૌર ચોથા સ્થાને રહી મેડલથી વંચિત રહી હતી, જ્યારે વેઇટલિફ્ટિંગમાં સંજના અપેક્ષા મુજબનું પ્રદર્શન કરી શકી નહોતી. તેમ છતાં ત્રણ મેડલ સાથે ભારતે સાતમો દિવસ સફળતાપૂર્વક પૂર્ણ કર્યો છે અને હવે આગામી સ્પર્ધાઓમાં વધુ પદકોની આશા જાગી છે.
