નંજયાંગ અને ગર્બાધાર પાસે ભેખડો ધસી પડતાં યાત્રા અટકી; 20 સરહદી ગામો અસરગ્રસ્ત, 16 ગ્રામ્ય માર્ગો હજુ પણ બંધ
દેહરાદૂન: ઉત્તરાખંડમાં સતત વરસી રહેલા ભારે વરસાદને કારણે કૈલાસ માનસરોવર યાત્રા ફરી એકવાર પ્રભાવિત થઈ છે. ધારચૂલાથી લગભગ 54 કિલોમીટર દૂર નંજયાંગ વિસ્તારમાં ભૂસ્ખલન થતાં તવાઘાટ-લિપુલેખ માર્ગ સંપૂર્ણ બંધ થઈ ગયો છે, જેના કારણે કૈલાસ માનસરોવર યાત્રા પર સીધી અસર પડી છે.
સોમવાર રાત્રિથી બંધ રહેલો ટનકપુર-તવાઘાટ રાષ્ટ્રીય ધોરીમાર્ગ બોર્ડર રોડ્સ ઓર્ગેનાઈઝેશન (BRO) દ્વારા ફરી શરૂ કરવામાં આવ્યો છે, જેના કારણે ઉચ્ચ હિમાલય વિસ્તાર સાથેનો સંપર્ક પુનઃસ્થાપિત થયો છે. જોકે, તવાઘાટ-લિપુલેખ માર્ગ હજુ પણ બંધ હોવાથી યાત્રાળુઓની અવરજવર સ્થગિત છે.
આ ઉપરાંત મુનસ્યારી-મિલમ માર્ગ પણ બાંગડિયાર વિસ્તારમાં બીજા દિવસે સતત બંધ રહ્યો હતો. બે મહત્વના માર્ગો બંધ થતાં 20 સરહદી ગામોનો સંપર્ક તૂટી ગયો છે, જ્યારે જિલ્લામાં 16 ગ્રામ્ય માર્ગો બંધ રહેતાં એક લાખથી વધુ લોકોના જનજીવન પર અસર પહોંચી છે.
જિલ્લામાં સોમવારથી સતત વરસી રહેલા વરસાદને કારણે અનેક સ્થળોએ ભૂસ્ખલનની ઘટનાઓ બની છે. ખાસ કરીને ગર્બાધાર વિસ્તારમાં પણ યાત્રા માર્ગ પર ભેખડો ધસી પડતાં વાહનવ્યવહાર સંપૂર્ણપણે અટકી ગયો છે.
વહીવટી તંત્ર અને BROની ટીમો માર્ગોને ફરી શરૂ કરવા યુદ્ધના ધોરણે કામગીરી કરી રહી છે. હવામાન વિભાગે આગામી દિવસોમાં પણ ભારે વરસાદની સંભાવના વ્યક્ત કરતાં યાત્રાળુઓ અને સ્થાનિક લોકોને બિનજરૂરી મુસાફરી ટાળવા તથા પ્રશાસનની સૂચનાઓનું પાલન કરવાની અપીલ કરી છે.
