અમેરિકી રાષ્ટ્રપતિનો દાવોઃ પુતિન સમજૂતી માટે તૈયાર છે, હવે ઝેલેન્સ્કી પણ તૈયાર થાય તો વાત આગળ વધી શકે
વોશિંગ્ટનઃ રશિયા-યુક્રેન યુદ્ધનો અંત લાવવા માટે ચાલી રહેલી રાજદ્વારી કવાયત વચ્ચે અમેરિકી રાષ્ટ્રપતિ ડોનાલ્ડ ટ્રમ્પે મોટો દાવો કર્યો છે. ટ્રમ્પના જણાવ્યા મુજબ, રશિયાના રાષ્ટ્રપતિ વ્લાદિમીર પુતિન યુદ્ધ સમાપ્ત કરવા માટે સમજૂતી કરવા તૈયાર છે. જોકે, તેમના મતે પુતિન અને યુક્રેનના રાષ્ટ્રપતિ વોલોદિમીર ઝેલેન્સ્કી વચ્ચેની વ્યક્તિગત દુશ્મનાવટ શાંતિ પ્રક્રિયામાં મોટો અવરોધ બની રહી છે.
ટ્રમ્પે કહ્યું કે પુતિન સાથે તેમની તાજેતરની વાતચીત સારી રહી હતી અને રશિયન રાષ્ટ્રપતિ યુક્રેન સાથે સમજૂતી માટે તૈયાર હોવાનું તેમણે અનુભવ્યું છે. હવે ઝેલેન્સ્કી પણ વાતચીત માટે તૈયાર થાય તો યુદ્ધનો અંત લાવવાની દિશામાં આગળ વધી શકાય તેમ ટ્રમ્પે જણાવ્યું.
‘બંને એકબીજાને પસંદ કરતા નથી’
ટ્રમ્પે દાવો કર્યો કે પુતિન અને ઝેલેન્સ્કી વચ્ચે લાંબા સમયથી તણાવ છે અને બંને વચ્ચેની વ્યક્તિગત દુશ્મનાવટને કારણે વાતચીતમાં પ્રગતિ થતી નથી. તેમના મતે, યુદ્ધનો ઉકેલ લાવવામાં આ બંને નેતાઓ વચ્ચેનો સંબંધ પણ એક મહત્વપૂર્ણ પરિબળ છે.
ટ્રમ્પના નિવેદન બાદ પણ રશિયા અને યુક્રેન વચ્ચેના મૂળભૂત મુદ્દાઓ યથાવત્ છે. ખાસ કરીને કબજા હેઠળના યુક્રેનિયન વિસ્તારો અને ભવિષ્યની સુરક્ષા વ્યવસ્થાને લઈને બંને પક્ષોની સ્થિતિમાં મોટો તફાવત છે.
અમેરિકી દૂતોની મોસ્કો-કિવ મુલાકાત
યુદ્ધ સમાપ્ત કરાવવા માટે અમેરિકાની રાજદ્વારી કવાયત પણ તેજ બની છે. અમેરિકાના વિશેષ દૂત સ્ટીવ વિટકોફ અને જેરેડ કુશનરે તાજેતરમાં મોસ્કોમાં પુતિન સાથે ચર્ચા કર્યા બાદ કિવમાં ઝેલેન્સ્કી સાથે પણ મુલાકાત કરી હતી. જોકે, આ મુલાકાતો બાદ કોઈ મોટો રાજદ્વારી બ્રેકથ્રૂ જાહેર થયો નથી.
રશિયા કબજે કરેલા વિસ્તારો અંગે પોતાની માગણીઓ પર અડગ હોવાના અહેવાલો છે, જ્યારે યુક્રેન પણ પોતાના પ્રદેશ અંગે સમાધાન કરવા તૈયાર નથી. આ જ પ્રાદેશિક મુદ્દો શાંતિ વાટાઘાટોમાં સૌથી મોટો અવરોધ બની રહ્યો છે.
હાલ અમેરિકાના પ્રયાસો છતાં રશિયા-યુક્રેન યુદ્ધમાં કોઈ અંતિમ સમજૂતી થઈ નથી અને બંને દેશો વચ્ચે સૈન્ય અથડામણો પણ ચાલુ છે.
