મહારાષ્ટ્રમાં ઓછા વરસાદના કારણે દુષ્કાળની સ્થિતિ ગંભીર બની છે. રાજ્યના 358માંથી 265 તાલુકાને દુષ્કાળગ્રસ્ત જાહેર કરવામાં આવ્યા છે. એટલે કે રાજ્યના આશરે 74% વિસ્તારમાં અછતની અસર જોવા મળી રહી છે. વરસાદની ઘટને કારણે ખરીફ પાકને મોટું નુકસાન થયું હોવાની ફરિયાદો ખેડૂતો દ્વારા કરવામાં આવી છે.
રાજ્યના ધારાશિવ અને બીડ સહિતના અનેક જિલ્લાઓમાં જુલાઈ બાદ પૂરતો વરસાદ ન થતાં પાકની સાથે પશુઓ અને ખેડૂતો માટે પાણીની સમસ્યા પણ વધી છે. ખેડૂતો દ્વારા પાક નુકસાનનું વળતર અને તાત્કાલિક દુષ્કાળ રાહત પેકેજની માંગ કરવામાં આવી રહી છે.
રાજ્ય સરકારના આંકડા મુજબ છત્રપતિ સંભાજીનગર ડિવિઝનમાં 1 જૂનથી 18 સપ્ટેમ્બર દરમિયાન 424.5 મીમી વરસાદ નોંધાયો હતો, જ્યારે સામાન્ય રીતે આ સમયગાળામાં 616.1 મીમી વરસાદ થવો જોઈએ. આમ, અહીં વરસાદમાં 30.8 ટકાની ઘટ નોંધાઈ છે. પુણે અને નાસિક ડિવિઝનમાં પણ આશરે 30% વરસાદની ઘટ નોંધાઈ છે.
અમરાવતી અને નાગપુર ડિવિઝનમાં વરસાદની ઘટ આશરે 27% રહી છે, જ્યારે કોંકણ ડિવિઝનમાં 6.3% ઘટ નોંધાઈ છે. રાજ્યમાં કુલ મળીને 18.8% વરસાદની ઘટ નોંધાઈ હોવાનું સરકારી આંકડાઓમાં જણાવાયું છે. કેટલાક જિલ્લાઓમાં વરસાદની ઘટ 40થી 50% સુધી પહોંચી છે.
વરસાદના અભાવે અનેક વિસ્તારોમાં ખરીફ પાક બરબાદ થવાની સ્થિતિ સર્જાઈ છે. 16 સપ્ટેમ્બરે વિવિધ જિલ્લાઓમાં ખેડૂતોએ દુષ્કાળ રાહત અને પાક નુકસાનના વળતરની માંગ સાથે વિરોધ પ્રદર્શન પણ કર્યા હતા. મુખ્યમંત્રી દેવેન્દ્ર ફડણવીસની દુષ્કાળગ્રસ્ત વિસ્તારોની મુલાકાત બાદ સરકાર દ્વારા પાક નુકસાનનો સર્વે અને જમીની ચકાસણી ટૂંક સમયમાં હાથ ધરવાની જાહેરાત કરવામાં આવી છે.
