ઈઝરાયેલની કંપની સાથે 900 મિલિયન ડોલરની ડીલની તૈયારી; બોઇંગના છ વિમાનોને ટેન્કરમાં ફેરવાશે, 30 ટકા કામ ભારતમાં થશે
ભારત અને ઈઝરાયેલ વચ્ચેના સંરક્ષણ સહયોગને વધુ મજબૂત બનાવવાની દિશામાં મહત્વપૂર્ણ પગલું ભરાઈ રહ્યું છે. ઈઝરાયેલની સરકારી કંપની ઈઝરાયેલ એરોસ્પેસ ઈન્ડસ્ટ્રીઝ (IAI) ભારતને હવામાં જ લડાયક વિમાનોમાં ઈંધણ ભરી શકે તેવા છ ટેન્કર વિમાનો પૂરા પાડવા માટે આશરે 900 મિલિયન ડોલરની ડીલ કરવાની તૈયારીમાં હોવાનું અહેવાલોમાં જણાવાયું છે.
આ સોદા હેઠળ કંપની છ બોઇંગ 767 વિમાનોને હવાઈ રિફ્યુઅલિંગ ટેન્કર વિમાનોમાં રૂપાંતરિત કરશે. આ પ્રકારનાં વિમાનોની મદદથી હવામાં ઉડતાં ફાઇટર જેટને જ ઈંધણ પૂરું પાડી શકાય છે. પરિણામે લડાયક વિમાનોને વારંવાર એરબેઝ પર પરત ફર્યા વિના લાંબા સમય સુધી હવામાં કામગીરી કરવાની ક્ષમતા મળી શકે છે.
આંતરરાષ્ટ્રીય સ્પર્ધામાં IAIની સફળતા
ભારતે હવાઈ રિફ્યુઅલિંગ ટેન્કર વિમાનોની ખરીદી માટે આંતરરાષ્ટ્રીય સ્તરે ટેન્ડર બહાર પાડ્યું હતું. આ પ્રક્રિયામાં યુરોપિયન અને રશિયન કંપનીઓ સહિત વિવિધ વિદેશી કંપનીઓએ રસ દાખવ્યો હતો. અહેવાલ મુજબ, આ સ્પર્ધામાં ઈઝરાયેલની IAI સૌથી સફળ બિડર તરીકે સામે આવી છે.
IAI એરોસ્પેસ અને એવિએશન ક્ષેત્રે કાર્યરત કંપની છે. તે લશ્કરી તેમજ નાગરિક ઉપયોગ માટેનાં વિમાનો, સંરક્ષણ સાધનો અને અન્ય ઉડ્ડયન ટેક્નોલોજી વિકસાવે છે. કંપની પાસે ઉપલબ્ધ બોઇંગ 767 વિમાનોને જરૂરી ટેક્નિકલ ફેરફારો કરીને હવાઈ ઈંધણ ભરવાના ટેન્કરમાં રૂપાંતરિત કરવામાં આવશે.
30 ટકા કામ ભારતમાં કરવામાં આવશે
આ પ્રોજેક્ટની એક મહત્વપૂર્ણ બાબત એ છે કે વિમાનોને ટેન્કર તરીકે રૂપાંતરિત કરવાના કુલ કામમાંથી આશરે 30 ટકા કામ ભારતમાં જ કરવામાં આવશે. આ માટે તબક્કાવાર ભારતીય ઉદ્યોગો અને સ્થાનિક કંપનીઓને પ્રોજેક્ટ સાથે જોડવાની યોજના છે.
આ વ્યવસ્થાથી ભારતીય ઉદ્યોગોને એરોસ્પેસ અને સંરક્ષણ ક્ષેત્રે નવી ટેક્નોલોજી તથા ઉત્પાદન પ્રક્રિયાનો અનુભવ મળી શકે છે. સાથે જ દેશમાં સંરક્ષણ સાધનોના નિર્માણ અને જાળવણીની ક્ષમતાને પણ પ્રોત્સાહન મળી શકે છે.
ભારતીય વાયુસેનાની ક્ષમતામાં વધારો
હવાઈ રિફ્યુઅલિંગ ટેન્કર વિમાનો ભારતીય વાયુસેના માટે વ્યૂહાત્મક રીતે ઉપયોગી સાબિત થઈ શકે છે. આ વિમાનોની મદદથી ફાઇટર જેટની હવામાં રહેવાની ક્ષમતા અને લાંબા અંતરની કામગીરીમાં વધારો થઈ શકે છે. ખાસ કરીને સરહદી વિસ્તારોમાં લાંબા સમય સુધી હવાઈ પેટ્રોલિંગ અને લશ્કરી અભિયાનો દરમિયાન આવા વિમાનો મહત્ત્વની ભૂમિકા ભજવી શકે છે.
આમ, છ ટેન્કર વિમાનોનો પ્રસ્તાવ ભારતની હવાઈ સંરક્ષણ ક્ષમતાને મજબૂત બનાવવાની દિશામાં મહત્વપૂર્ણ ગણાઈ રહ્યો છે. જોકે, સોદાની અંતિમ મંજૂરી, કરારની શરતો અને વિમાનોની ડિલિવરી અંગેની સત્તાવાર વિગતોની પુષ્ટિ થવી બાકી છે.
