સુરક્ષાને ધ્યાનમાં રાખીને ‘ઓલ સ્ટાર્સ ફૂટબોલ ક્લબ’ની તમામ ટ્રેનિંગ અને મેચો હાલ પૂરતી સ્થગિત
બોલિવૂડ અભિનેતા ટાઇગર શ્રોફ પર તાજેતરમાં થયેલા હુમલા બાદ ફિલ્મ જગતમાં સુરક્ષાને લઈને ચિંતા વધી છે. આ ઘટનાને પગલે ‘ઓલ સ્ટાર્સ ફૂટબોલ ક્લબ’ (ASFC) દ્વારા મોટો નિર્ણય લેવામાં આવ્યો છે. ક્લબે સુરક્ષાનાં કારણોસર પોતાની તમામ ફૂટબોલ ટ્રેનિંગ અને મેચો હાલ પૂરતી સ્થગિત કરી દીધી છે.
ટાઇગર શ્રોફ ઉપરાંત કાર્તિક આર્યન, રણબીર કપૂર અને અભિષેક બચ્ચન સહિતના જાણીતા બોલિવૂડ કલાકારો પણ દર રવિવારે યોજાતા ફૂટબોલ સેશનમાં ભાગ લેતા હતા. જોકે, હાલની પરિસ્થિતિને ધ્યાનમાં રાખીને આ સેશન ફરી શરૂ ન થાય ત્યાં સુધી આ કલાકારો મેદાનમાં ફૂટબોલ રમતા જોવા નહીં મળે.
પોલીસની મંજૂરી અને સુરક્ષા વ્યવસ્થા બાદ જ મેચો શરૂ થશે
‘ઓલ સ્ટાર્સ ફૂટબોલ ક્લબ’ના માલિક બેંટી વાલિયાના જણાવ્યા અનુસાર, હાલ તમામ ફૂટબોલ ટ્રેનિંગ સેશન બંધ રાખવામાં આવ્યા છે. સેશન ફરી શરૂ કરતાં પહેલાં પોલીસનો સંપર્ક કરવામાં આવશે અને સુરક્ષાને લગતી જરૂરી વ્યવસ્થાઓ સુનિશ્ચિત કરવામાં આવશે.
તેમણે સ્પષ્ટ કર્યું કે જ્યાં સુધી સુરક્ષાની પૂરતી વ્યવસ્થા નહીં થાય ત્યાં સુધી ફૂટબોલ સેશન અને મેચો ફરી શરૂ કરવામાં આવશે નહીં. ખેલાડીઓ અને તેમાં ભાગ લેનારા તમામ લોકોની સુરક્ષા ક્લબ માટે સૌથી મહત્ત્વપૂર્ણ છે.
ટાઇગર શ્રોફ પર થયેલા હુમલા બાદ લેવાયેલા આ નિર્ણયથી બોલિવૂડના સ્ટાર્સના નિયમિત ફૂટબોલ સેશન પર પણ અસર પડી છે. જોકે, સેશન ફરી ક્યારે શરૂ થશે તે અંગે હજુ સુધી કોઈ ચોક્કસ તારીખ જાહેર કરવામાં આવી નથી.
