લીઝ કરારના વિવાદમાં અંધાધૂંધ ફાયરિંગ; હોટલ માલિકના પરિવારના સભ્યો સહિત પાંચનાં મોત, એક ઘાયલ
આસામના ગુવાહાટીના બોરા સર્વિસ વિસ્તારમાં આવેલી ‘હોટલ વિલાસ ઇન’માં સોમવારે રાત્રે મિલકત વિવાદને પગલે ગોળીબારની ગંભીર ઘટના બની હતી. હોટલના ભાડૂઆત ઘનકાંત ગોગોઈ અને માલિક પક્ષ વચ્ચે લીઝ એગ્રીમેન્ટને લઈને ચાલી રહેલા વિવાદ દરમિયાન ફાયરિંગ થયું હતું. આ ઘટનામાં પાંચ લોકોનાં મોત થતાં સમગ્ર વિસ્તારમાં ચકચાર મચી ગઈ છે.
મળતી માહિતી મુજબ, મૃતકોમાં હોટલ માલિક હેલેના ભરાલી, તેમના ભાઈ ભુદેવ ભરાલી, પુત્ર દેવર્ષિ કશ્યપ, પુત્રવધૂ રિનિકી કશ્યપ અને ડ્રાઇવર નારાયણ દાસનો સમાવેશ થાય છે. મિલકતના વિવાદે આટલું ગંભીર સ્વરૂપ ધારણ કરતાં સ્થાનિક સ્તરે પણ ચિંતા ફેલાઈ છે.
છ લોકોને ગોળી વાગી, એકની હાલત સ્થિર
ગુવાહાટીના પોલીસ કમિશનર ડૉ. પાર્થ સારથિ મહંતના જણાવ્યા અનુસાર, ફાયરિંગમાં કુલ છ લોકોને ગોળી વાગી હતી. તેમાંથી પાંચનાં મોત થયાં હતાં, જ્યારે હોટલના કેરટેકર સત્યેન્દ્ર પાઠક ગંભીર રીતે ઘાયલ થયા હતા. તેમને ગુવાહાટી મેડિકલ કોલેજ અને હોસ્પિટલમાં સારવાર માટે ખસેડવામાં આવ્યા હતા. અહેવાલ મુજબ, તેમની હાલત સ્થિર છે.
એક કલાકમાં આરોપીની ધરપકડ
પોલીસે ઘટના બાદ ઝડપી કાર્યવાહી કરીને આશરે એક કલાકની અંદર આરોપી ઘનકાંત ગોગોઈની ધરપકડ કરી હતી. પોલીસ દ્વારા ગુનામાં વપરાયેલી .32 બોરની પરવાનાવાળી પિસ્તોલ પણ જપ્ત કરવામાં આવી છે. હવે ફાયરિંગ પાછળનાં ચોક્કસ કારણો અને ઘટનાક્રમ અંગે તપાસ હાથ ધરવામાં આવી રહી છે.
રાજકીય પ્રતિક્રિયાઓ, તપાસ તેજ
ઘટના બાદ ગુવાહાટીમાં કાયદો અને વ્યવસ્થાની સ્થિતિ અંગે સવાલો ઊભા થયા છે. આસામ કોંગ્રેસે ઘટનામાં થયેલા મૃત્યુ અંગે શોક વ્યક્ત કર્યો હતો અને રાજ્ય સરકારની કામગીરી અંગે ચિંતા દર્શાવી હતી.
હાલ પોલીસ ફોરેન્સિક અને અન્ય વૈજ્ઞાનિક પુરાવા એકત્ર કરી રહી છે. મિલકત અને લીઝ કરારને લઈને ચાલતો વિવાદ ગોળીબાર સુધી કેવી રીતે પહોંચ્યો, તે સહિતના મુદ્દાઓની તપાસ કરવામાં આવી રહી છે.
