એર ફ્યુઅલના ભાવ વધતાં ઈન્ડિગોએ ફ્યુઅલ સરચાર્જ વધાર્યો; હૈદરાબાદ અને બેંગલુરુના ભાડામાં પણ રૂ. 500થી 700 સુધીનો વધારો
રાજકોટથી હવાઈ મુસાફરી કરતા મુસાફરો માટે વધુ ખર્ચ કરવાનો વારો આવ્યો છે. ઈન્ડિગો એરલાઈન્સ દ્વારા ડોમેસ્ટિક અને ઇન્ટરનેશનલ હવાઈ સેવાઓમાં ફ્યુઅલ સરચાર્જ વધારવામાં આવતાં હવાઈ ભાડાંમાં વધારો થયો છે. તેની સીધી અસર રાજકોટથી દિલ્હી અને મુંબઈ જતાં મુસાફરો પર પડી છે. રાજકોટ-દિલ્હી રૂટના ભાડામાં રૂ. 2,500 જ્યારે રાજકોટ-મુંબઈ રૂટના ભાડામાં રૂ. 1,000નો વધારો થયો હોવાનું જાણવા મળ્યું છે.
એર ફ્યુઅલના ભાવ વધતાં ભાડાંમાં વધારો
તાજેતરમાં એર ફ્યુઅલના ભાવમાં પ્રતિ લીટર રૂ. 16નો વધારો થતાં એરલાઈન્સ કંપનીઓના સંચાલન ખર્ચમાં વધારો થયો છે. આ વધારાના પગલે ઈન્ડિગો એરલાઈન્સે ફ્યુઅલ સરચાર્જમાં વધારો કરવાનો નિર્ણય લીધો છે. કંપની દ્વારા દેશભરની ડોમેસ્ટિક સેવાઓમાં ફ્યુઅલ સરચાર્જ વધારવામાં આવતાં વિવિધ રૂટનાં હવાઈ ભાડાં મોંઘાં બન્યાં છે.
રાજકોટથી દિલ્હી જતી ફ્લાઇટના ભાડામાં રૂ. 2,500 અને મુંબઈ જતી ફ્લાઇટના ભાડામાં રૂ. 1,000નો વધારો થતાં મુસાફરોના બજેટ પર વધારાનો બોજ પડશે. ખાસ કરીને નોકરી, વ્યવસાય અને અન્ય કામકાજ માટે વારંવાર હવાઈ મુસાફરી કરતા લોકોને હવે વધુ નાણાં ખર્ચવા પડશે.
અન્ય શહેરોના ભાડાંમાં પણ વધારો
દિલ્હી અને મુંબઈ ઉપરાંત હૈદરાબાદ તથા બેંગલુરુ જેવા શહેરોના હવાઈ ભાડાંમાં પણ વધારો જોવા મળી રહ્યો છે. આ રૂટ પર ભાડાંમાં રૂ. 500થી રૂ. 700 સુધીનો વધારો થયો હોવાનું જાણવા મળ્યું છે. ફ્યુઅલ સરચાર્જમાં વધારાને કારણે વિવિધ શહેરો વચ્ચેની હવાઈ મુસાફરી મોંઘી બની રહી છે.
રાજકોટથી અનેક શહેરો માટે સીધી હવાઈ સેવા
રાજકોટના હિરાસર સ્થિત આંતરરાષ્ટ્રીય એરપોર્ટ પરથી ઈન્ડિગો દ્વારા દિલ્હી, મુંબઈ, હૈદરાબાદ, બેંગલુરુ, નવી મુંબઈ અને પુણે સહિતનાં શહેરો માટે સીધી હવાઈ સેવા પૂરી પાડવામાં આવે છે. આ રૂટ પર મુસાફરી કરતા પ્રવાસીઓ અને વેપારીઓ માટે ભાડામાં થયેલો વધારો મહત્વનો બની રહેશે.
એર ફ્યુઅલના વધેલા ભાવની અસર હવે હવાઈ મુસાફરીના ખર્ચમાં પણ જોવા મળી રહી છે. ફ્યુઅલ સરચાર્જ વધતાં રાજકોટથી વિવિધ શહેરોમાં જતી ઈન્ડિગોની ફ્લાઇટમાં મુસાફરી કરતા લોકોને વધુ ભાડું ચૂકવવું પડશે.
