નવી દિલ્હી: પાકિસ્તાનના પૂર્વ વડાપ્રધાન અને 1992ના વર્લ્ડ કપ વિજેતા કેપ્ટન ઈમરાન ખાન સાથે જેલમાં થઈ રહેલા કથિત વર્તન અંગે ભારતના પૂર્વ ક્રિકેટર અને ટીમ ઈન્ડિયાના ભૂતપૂર્વ મુખ્ય કોચ રવિ શાસ્ત્રીએ ચિંતા વ્યક્ત કરી છે. તેમણે ઈમરાન ખાનની સ્થિતિને ‘આઘાતજનક’ ગણાવી માનવતાના ધોરણે તેમની સાથે યોગ્ય વર્તન કરવા અપીલ કરી છે.
અહેવાલો મુજબ, ઈમરાન ખાન વર્ષ 2023થી રાવલપિંડીની અદિયાલા જેલમાં બંધ છે. તેમની તબિયત અને જેલમાં મળતી સુવિધાઓ અંગે ચિંતા વ્યક્ત કરવામાં આવી રહી છે. તેમની જમણી આંખની દૃષ્ટિમાં ભારે ઘટાડો થયાના અહેવાલો પણ સામે આવ્યા છે. આ મામલે અગાઉ 21 ભૂતપૂર્વ આંતરરાષ્ટ્રીય ક્રિકેટ કેપ્ટનોએ પાકિસ્તાનના વડાપ્રધાન શહબાઝ શરીફને પત્ર લખીને ઈમરાન ખાનને યોગ્ય તબીબી સારવાર અને જરૂરી સુવિધાઓ પૂરી પાડવાની અપીલ કરી હતી.
રિપબ્લિક વર્લ્ડ સાથેની વાતચીત દરમિયાન રવિ શાસ્ત્રીએ સ્પષ્ટ કર્યું હતું કે તેઓ રાજકારણી નથી અને પાકિસ્તાનની આંતરિક રાજનીતિ વિશે ટિપ્પણી કરવા માગતા નથી. જોકે, ઈમરાન ખાન સાથે થઈ રહેલા વ્યવહાર અંગે તેમણે દુઃખ અને આશ્ચર્ય વ્યક્ત કરતાં કહ્યું હતું કે કોઈ પણ વ્યક્તિ સાથે આવી રીતે વર્તવું ન જોઈએ. તેમના મતે, આ મુદ્દાને રાજકીય દૃષ્ટિકોણથી નહીં, પરંતુ માનવતાના દૃષ્ટિકોણથી જોવો જોઈએ.
ઈમરાન ખાન જેલમાંથી ક્યારે બહાર આવશે તે અંગે પૂછવામાં આવતાં શાસ્ત્રીએ આશા વ્યક્ત કરી હતી કે તેઓ વહેલી તકે બહાર આવે અને તેમને વધુ સારી સુવિધાઓ તથા યોગ્ય સારવાર મળે. તેમણે ભારપૂર્વક જણાવ્યું હતું કે એક માનવી તરીકે ઈમરાન ખાન આવી પરિસ્થિતિને લાયક નથી.
‘ઈમરાન ખાન મહાન ક્રિકેટર અને અદભુત નેતા’
રવિ શાસ્ત્રીએ ઈમરાન ખાનની ક્રિકેટ કારકિર્દી અને નેતૃત્વની પણ પ્રશંસા કરી હતી. તેમણે ઈમરાનને મહાન ઓલરાઉન્ડર અને પ્રભાવશાળી નેતા ગણાવતાં 1992ના વર્લ્ડ કપમાં પાકિસ્તાનને ચેમ્પિયન બનાવવામાં તેમની ભૂમિકાને યાદ કરી હતી.
શાસ્ત્રીના મતે, ઈમરાન ખાનની સૌથી મોટી વિશેષતા યુવા ખેલાડીઓમાં આત્મવિશ્વાસ જગાડવાની અને મુશ્કેલ પરિસ્થિતિમાં પણ ટીમને જીત તરફ દોરી જવાની હતી. તેમની આગેવાની હેઠળ પાકિસ્તાને 1992નો વર્લ્ડ કપ જીત્યો હતો, જે દેશના ક્રિકેટ ઇતિહાસની મહત્ત્વપૂર્ણ સિદ્ધિ ગણાય છે.
ભારત અને પાકિસ્તાન વચ્ચે મેદાન પર હંમેશાં તીવ્ર હરીફાઈ રહી હોવા છતાં, ક્રિકેટ જગતમાં પરસ્પર સન્માનનું વિશેષ સ્થાન રહ્યું છે. શાસ્ત્રીની ટિપ્પણીઓ પણ આ જ માનવીય અભિગમને દર્શાવે છે. ઈમરાન ખાનની તબિયત અને તેમની સાથેના વર્તન અંગે ઊભી થયેલી ચિંતાઓ વચ્ચે હવે તેમની સ્થિતિ અંગે આગળ શું પગલાં લેવાય છે તેના પર સૌની નજર રહેશે.
