દિલ્હીના ઉસ્માનપુરા વિસ્તારમાં પોલીસ અને અપરાધીઓ વચ્ચે થયેલા એન્કાઉન્ટરમાં બે આરોપી ઘાયલ થયા છે. પોલીસના જણાવ્યા અનુસાર, આરોપીઓએ પોલીસ ટીમ પર ગોળીબાર કર્યો હતો. જોકે, બુલેટપ્રૂફ જેકેટ પહેરેલા હોવાથી બે પોલીસકર્મીઓનો બચાવ થયો હતો. આ અથડામણ દરમિયાન બંને તરફથી કુલ 26 રાઉન્ડ ગોળીબાર થયો હતો.
મળતી માહિતી મુજબ, સ્પેશિયલ સ્ટાફની ટીમને બાતમી મળી હતી કે બે આરોપીઓ જંગલના રસ્તે ઉસ્માનપુરા વિસ્તારમાં આવેલા પોતાના ઘરે પહોંચવાના છે. આ બાતમીના આધારે પોલીસે વિસ્તારમાં જાળ બિછાવી હતી. પોલીસની ટીમ આરોપીઓ સુધી પહોંચતાં જ બંનેએ પોલીસ પર ફાયરિંગ શરૂ કરી દીધું હતું. જવાબમાં પોલીસે પણ ગોળીબાર કર્યો હતો.
આ અથડામણ દરમિયાન આરોપીઓના ફાયરિંગથી બે પોલીસકર્મીઓ જોખમમાં મુકાયા હતા, પરંતુ બુલેટપ્રૂફ જેકેટને કારણે તેઓ સુરક્ષિત રહ્યા હતા. પોલીસની જવાબી કાર્યવાહીમાં કેફ અને જસીમ નામના બંને આરોપીઓને ગોળી વાગતાં તેઓ ઘાયલ થયા હતા. બંનેને સારવાર માટે હોસ્પિટલમાં ખસેડવામાં આવ્યા છે.
હાલમાં પોલીસ બંને આરોપીઓના ગુનાહિત ઇતિહાસની તપાસ કરી રહી છે. તેમની સામે અગાઉ કયા ગુનાઓમાં કેસ નોંધાયેલા છે અને અન્ય કોઈ ગુનામાં તેમની સંડોવણી છે કે કેમ, તે અંગેની માહિતી એકત્રિત કરવામાં આવી રહી છે.
