રશિયાએ યુક્રેનના બીજા સૌથી મોટા શહેર ખારકીવ અને રાજધાની કીવ પર ભીષણ હવાઈ હુમલા કર્યા છે. ખારકીવમાં થયેલા હુમલામાં એક વ્યક્તિનું મોત નીપજ્યું છે, જ્યારે છ લોકો ઘાયલ થયા છે. ખારકીવના મેયર ઈહોર તેરેખોવે આ ઘટનાની પુષ્ટિ કરી છે. બીજી તરફ, કીવમાં રશિયન ડ્રોને નીપ્રો નદી પર આવેલા મહત્વપૂર્ણ ઉત્તરી બ્રિજને નિશાન બનાવ્યો હતો. હુમલા બાદ બ્રિજ પર આગના વિશાળ ગોળા અને કાળા ધુમાડાના ગોટેગોટા જોવા મળ્યા હતા.
આ હુમલાઓ એવા સમયે થયા છે, જ્યારે જર્મન ચાન્સલર ફ્રેડરિક મર્ઝ યુક્રેનના રાષ્ટ્રપતિ વોલોદિમીર ઝેલેન્સ્કી સાથે મુલાકાત કરવા કીવ પહોંચ્યા હતા. તેમની મુલાકાત દરમિયાન જ શહેરમાં હવાઈ હુમલાની ચેતવણી આપતા સાયરન વાગવા લાગ્યા હતા અને યુક્રેનની હવાઈ સંરક્ષણ વ્યવસ્થા સક્રિય કરવામાં આવી હતી. મર્ઝે ચેતવણી આપી હતી કે આગામી સપ્તાહોમાં યુક્રેનને તમામ જરૂરી સહાય પૂરી પાડવી અત્યંત જરૂરી છે. જો રશિયાને રોકવામાં નહીં આવે, તો તેનું યુદ્ધ મશીન ભવિષ્યમાં યુરોપ માટે પણ જોખમ ઊભું કરી શકે છે.
કીવના પરિવહન વ્યવસ્થામાં મહત્ત્વપૂર્ણ ગણાતા ઉત્તરી બ્રિજ પર છેલ્લા કેટલાક દિવસોમાં આ બીજો હુમલો હોવાનું જણાવાયું છે. આ ઉપરાંત દક્ષિણ તરફના એક અન્ય બ્રિજને પણ નિશાન બનાવવામાં આવ્યો છે. યુક્રેનના અધિકારીઓએ આશંકા વ્યક્ત કરી છે કે જો પુલોને નિશાન બનાવવાના હુમલા ચાલુ રહેશે, તો નીપ્રો નદીના બંને કાંઠા વચ્ચેનો સંપર્ક ખોરવાઈ શકે છે અને કીવના બે ભાગો વચ્ચે અવરજવરમાં ગંભીર મુશ્કેલી ઊભી થઈ શકે છે.
નીપ્રો નદીના એક કાંઠે સરકારી કચેરીઓ અને બીજા કાંઠે મોટા રહેણાંક વિસ્તારો આવેલા હોવાથી પુલો પરના હુમલાઓને ગંભીરતાથી લેવામાં આવી રહ્યા છે. સંભવિત જોખમને ધ્યાનમાં રાખીને યુક્રેન વૈકલ્પિક પરિવહન માર્ગો ઊભા કરવાની યોજના બનાવી રહ્યું છે. જર્મન ચાન્સલરની મુલાકાત દરમિયાન થયેલા આ હુમલાઓએ યુક્રેનની સુરક્ષા અને યુરોપમાં વધતા સંભવિત જોખમ અંગે ચિંતાઓ વધુ ઘેરી બનાવી છે.
