વિમાની ઈંધણના ભાવમાં વધારાને પગલે દેશની અગ્રણી એરલાઇન ઈન્ડિગોએ ઘરેલુ અને આંતરરાષ્ટ્રીય ફ્લાઇટ્સના ફ્યુઅલ સરચાર્જમાં વધારો કરવાની જાહેરાત કરી છે. આ નવો વધારો 6 તારીખથી અમલમાં આવતાં હવાઈ મુસાફરી માટે મુસાફરોએ વધુ નાણાં ચૂકવવા પડશે. ફ્લાઇટના અંતર અને ગંતવ્ય સ્થાનના આધારે સરચાર્જમાં વધારો કરવામાં આવ્યો છે.
કેન્દ્ર સરકાર દ્વારા તાજેતરમાં વિમાની ઈંધણના ભાવમાં પ્રતિ લીટર રૂ.16નો વધારો કરવામાં આવ્યો હતો. અગાઉના મહિનામાં પણ ઈંધણ મોંઘું થતાં એરલાઇન્સના સંચાલન ખર્ચમાં વધારો થયો છે. આ પરિસ્થિતિને ધ્યાનમાં રાખીને ઈન્ડિગોએ ટૂંકા અંતરની ઘરેલુ ફ્લાઇટથી લઈને લાંબા અંતરની આંતરરાષ્ટ્રીય ફ્લાઇટ સુધીના ફ્યુઅલ સરચાર્જમાં ફેરફાર કર્યો છે.
નવા દરો મુજબ, 500 કિલોમીટર સુધીની મુસાફરી માટેનો સરચાર્જ રૂ.275થી વધારીને રૂ.375 કરવામાં આવ્યો છે. 500થી 1,000 કિલોમીટર સુધીના અંતર માટે રૂ.400ના બદલે રૂ.600 અને 1,000થી 1,500 કિલોમીટર સુધીના અંતર માટે રૂ.600ના બદલે રૂ.900 ચૂકવવા પડશે. લાંબા અંતરની ફ્લાઇટ્સમાં પણ સરચાર્જ વધારવામાં આવ્યો છે.
આંતરરાષ્ટ્રીય ફ્લાઇટ્સ માટે પણ મુસાફરો પર વધારાનો બોજ પડશે. સાર્ક દેશોના રૂટ પર સરચાર્જમાં નોંધપાત્ર વધારો કરવામાં આવ્યો છે, જ્યારે આફ્રિકા અને યુરોપ જતી ફ્લાઇટ્સ માટે પણ ઊંચો ફ્યુઅલ સરચાર્જ લાગુ કરવામાં આવશે. લાંબા અંતરની આંતરરાષ્ટ્રીય મુસાફરી માટે સરચાર્જ રૂ.10,000 સુધી પહોંચી શકે છે.
વિમાની ઈંધણ અને આંતરરાષ્ટ્રીય બજારમાં ક્રૂડ ઓઇલના ભાવમાં વધારાની અસર હવે હવાઈ મુસાફરી પર પણ જોવા મળી રહી છે. ઈન્ડિગોના આ નિર્ણયથી ઘરેલુ અને વિદેશી પ્રવાસનું બજેટ વધશે, જેના કારણે મુસાફરોએ ટિકિટ બુક કરાવતી વખતે અગાઉ કરતાં વધુ ખર્ચ માટે તૈયાર રહેવું પડશે.
